Solenn at Rocco, magkatambal sa romantic comedy movie na 'Flotsam'

Inamin ni Solenn Heussaff na mayroon silang intimate scenes ni Rocco Nacino sa indie movie na "Flotsam." Hindi kaya nailang dito si Solenn dahil real life boyfriend ng kaibigan niyang si Lovi Poe ang aktor?


 
Sa "Chika Minute" report ni Aubrey Carampel sa GMA News 24 Oras nitong Miyerkules, sinabing hindi lang sa acting napasabak si Solenn sa pinagbibidahang indie movie na "Flotsam" kung hindi maging sa kantahan.

Nagmistula umanong beach jamming session ang naganap sa presscon ng pelikula dahil inawit dito ang ilang orginal songs mula sa movie soundtrack.

Isang beach babe ang role ni Solenn at katambal niya ang "Beautiful Strangers" leading man na si Rocco Nacino.

At isa sa mga pinag-usapan sa naturang movie ang love scene nila ni Rocco.

Birong pag-amin ni Solenn, "May mga intimate scenes kami (ni Rocco)... (kaya) Lovi you better watch out."

Pagseryoso niya, wholesome naman daw ang kabuuan ng pelikula na isang romantic comedy.

Dagdag ni Solenn, komportable siyang katrabaho si Rocco at wala raw dapat ikabahala ang kani-kanilang real life partners.

Samantala, matipid pa rin ang mga sagot ni Solenn tungkol sa kanilang love life lalo na ang tungkol sa wedding preparation nila ng fiancé na si Nico Bolzico.

Bagaman wala daw siyang maibibigay na update sa kasal, sinabi ni Solenn na ang isang sigurado ay wala itong kasamang beach. -- FRJ, GMA News