Jessie J, may mensahe sa kaniyang Pinoy fans habang naka-'pabebe' wave

Matapos ang matagumpay niyang concert nitong Huwebes, plano ng international singer na si Jessie J na mamasyal sa bansa bago siya umalis. May mensahe rin siya sa mga Kapuso na sinambit niya sa wikang Pilipino habang naka-"pabebe" wave.

Dahil sa matagumpay niyang concert last year, muling bumalik sa Pilipinas ang British singer-songwriter na si Jessie J para sa one night only free concert kagabi.

Kuwento ni Jessie J na nasa likod ng mga sikat na awiting "Price Tag", "Bang-bang" at "Flashlight," unforgettable ang concert niya sa bansa noong 2014 kaya enjoy siya sa kaniyang pagbabalik.

Very thankful din ang singer dahil nag-platinum sa Pilipinas ang kanyang huling album.

Kasama raw sa plano ni Jessie J ang maglibot sa magagandang beaches sa bansa bago siya umalis.

Sa tulong naman ng isang kasama, masayang nagbigay ng mensahe si Jessie J sa wikang Filipino habang naka-"pabebe" wave, "Mga Kapuso, magmahalan tayo ngayong Pasko." -- FRJ, GMA News