GMA-7 presenting options for Marian Rivera's primetime return

Maraming kakaibang love stories ang handog ng GMA Network sa mga manonood ngayong 2017, kaya naman marami rin ang nagtatanong kung bibida na nga ba muli ang tambalan nina Dingdong Dantes at Marian Rivera sa Primetime.

Huling pinagbidahan ng mag-asawa at Kapuso Primetime King and Queen ang "My Beloved," isang Kapuso romantic drama-suspense-thriller noong 2012.

Ayon kay GMA SVP for Entertainment TV Lilybeth G. Rasonable, matapos ang ilang taon, malapit na ang pagbabalik ng dalawa sa Primetime.

Abala man si Dingdong sa kaniyang pagbida sa "Alyas Robin Hood," sinisikap raw ng GMA Entertainment TV na mapagbigyan ang hiling ng DongYan fans ngayong taon.

"Dingdong will still be busy with 'Alyas Robin Hood' during the first quarter. As for Marian, we are presenting some options to her for her comeback. But definitely, she will be part of primetime," paliwanag ng GMA executive.

Bukod dito, nakahanda na rin ang bagong docu-drama na "Case Closed," na pangungunahan ni Dingdong bilang host.

"Using the elements of interview, dramatization, actual videos and photos... (The program) will present to the viewers the know-hows of crime prevention," paliwanag sa inilabas na press release nitong Lunes.

Kabilang rin sa mga bubuo ng proyektong ito sina Direk Albert Langitan, head writer na si Loi Landicho, at program manager na si Nini Matilac.

Ilan pa sa mga inihandang programa ng GMA Network ngayong 2017 ang "Destined To Be Yours" nina Alden Richards at Maine Mendoza, at ang Pinoy version ng hit Koreanovela na  "My Love From The Star" nina Jennylyn Mercado at Gil Cuerva.

Inaabangan na rin ng marami ang "Mulawin vs. Ravena," na pagbibidahan nina Dennis Trillo, Miguel Tanfelix, Bianca Umali, Regine Velasquez Derrick Monasterio, Bea Binene, at marami pang iba. —JST, GMA News