Misis ng kongresista na kahawig ni Marian Rivera

Alamin kung sino ang misis ng isang actor turned politician na sinasabing kahawig ni Kapuso Primetime Queen Marian Rivera.

Sa Starbites report sa "Balitanghali" ni Nelson Canlas nitong Biyernes, sinabing naging usap-usapan sa social media ang mga larawan na ipinost sa Instagram ni Yasmine Vargas, dahil sa pagiging magkahawig nila ni Marian.

Si Yasmine ay butihing maybahay ng aktor na si Alfred Vargas, na kongresista rin ngayon ng Quezon City.

Pinaghalong Pinay at Italian si Yasmine, na lumaki sa Milan, Italy.

Habang si Marian, Pinay ang ina at mula naman sa Spain ang ama.

Ikinasal sina Alfred at Yasmine noong 2010 at mayroon na silang dalawang anak.-- FRJ, GMA News