GMA programs, personalities recognized by PMPC Star Awards for TV

Pinarangalan ang mga programa at personalidad ng GMA at GMA News TV sa 28th PMPC Star Awards for TV, ayon sa ulat ni Cata Tibayan sa "24 Oras" nitong Martes.

 

Kabilang sa mga binigyang parangal ang batikang broadcast journalist, "Imbestigador ng Bayan" at "24 Oras" anchor na si Mike Enriquez para sa Excellence in Broadcast, habang tinanghal namang Best News Program ang "State of the Nation with Jessica Soho" at Best Female Newscaster si Jessica Soho.

 

 

Ayon kay Enriquez, “Hindi biro maging mamamahayag lalo na dito sa Pilipinas, kailangan ng isang demokrasya ang isang malaya at matapang na media at lalo nating ibibigay 'yan sa kanila lalo na't nai-inspire tayo sa mga awards na ganito.”

 

Hinirang naman na Best Public Service Program Host si Vicky Morales para sa "Wish Ko Lang," Best Documentary Program ang "i-Witness," at ang mga host nito na sina Sandra Aguinaldo, Howie Severino, Jay Taruc, Kara David bilang Best Documentary Program Hosts, habang itinanghal naman na Best Magazine Show ang "I-Juander" at ang mga host nito na sina Cesar Apolinario at Susan Enriquez bilang Best Magazine Show Hosts.

 

Best Educational Program naman ang "Born to be Wild," Best Drama Anthology ang "Magpakailanman" ni Mel Tiangco, Best Children's Show at Best Children's Show Hosts ang "Tropang Potchi," at Best Lifestyle Show ang "Gandang Ricky Reyes."

 

Tinanghal namang Hall of Famer ang longest-running gag show sa bansa na "Bubble Gang," habang hinirang na Best Comedy Actress ang reyna ng show na si Rufa Mae Quinto at Best Comedy Actor naman si Sef Cadayona, na nagulat pa sa pagkamit ng nasabing award.

 

Kinilalang Best Game Show ang "Celebrity Bluff" ni Eugene Domingo, habang Best Male Showbiz-Oriented Talk Show Host naman ang "Startalk" host at veteran showbiz writer na si Ricky Lo. 

 

Nakamit naman ni Jose Manalo ang Best Single Performance by an Actor para sa pagganap niya sa "Eat Bulaga" Lenten Special na "Hulog ng Langit," at iginawad kay Nova Villa ang Ading Fernando Lifetime Achievement Award. — Bianca Rose Dabu/JST, GMA News