8 pelikula ipapalabas sa Pista ng Pelikulang Pilipino 2018 sa Agosto

Mula sa 12 pelikula ay walo na lamang ang ipapalabas sa gaganaping Pista ng Pelikulang Pilipino (PPP) sa Agosto ngayong taon, pahayag ng Film Development Council of The Philippines (FDCP).

Sa ginanap na media launch ng PPP 2 nitong nakalipas na Huwebes, inianunsyo ni FDCP chairperson and CEO Liza Diño ang mga bagong miyembro ng jury at mga bagong mechanics sa pagsali rito.

Ayon kay Diño, sa halip na 12 na pelikula ang itatampok ay walo lamang ang ipapalabas ngayong taon.

"Instead of 12, eight films na lang siya. Kasi 'yung one week is not enough for the Filipinos to watch 12 films. So unfair naman du'n sa pang-eight to 12 na talagang wala na silang audience," saad niya.

Sinabi ni Diño na Hunyo 15 ang deadline para sa pag-sumbmit ng pelikula.

"PPP comes at an impeccable time especially now that we are celebrating the One Hundred Years of Philippine Cinema. FDCP believes that beyond this centennial, it is high time for us to show the world the best of our films by pushing for international distribution," saad naman ni Diño sa Facebook ng PPP.

"We want to inspire our filmmakers to reach audiences beyond our borders by producing films that are quality-made, well-developed, and produced with a wide local and global audience in mind. PPP encourages this by becoming their jump-off point," kaniyang pagpapatuloy.

"With an updated mechanics, PPP is welcoming new films produced from 2017-2018 which will have their Philippine Premiere in Pista," ayon sa statement ng PPP2.

Bukod dito, nasa ikalawang taon na rin ang Sine Kabataan Short Film Competition para sa mga batang filmmakers edad 15-30, sa pamumuno ng FDCP at partner nitong The United Nations Children's Fund (UNICEF).

Magsisilbi ngayong taon ang singer, actor, at youth advocate na si Ice Seguerra bilang Sine Kabataan Ambassador.

Nakatakdang ianunsyo ang walong pelikulang napili bilang official entries sa unang linggo ng Hulyo 2018.

Ang Pista ng Pelikulang Pilipino 2 ay tatakbo mula Agosto 15-21, 2018. —ALG, GMA News