Regine Velasquez says showbiz is too soon for son Nate

Natutuwa si Regine Velasquez na unti-unti ay nae-expose ang four-year-old son nila ni Ogie Alcasid na si Nate sa industriyang ginagalawan nila — ang showbiz.

Ilang TV commercials at product endorsements na kasi ang nagawa ni Nate na madalas ay kasama pa si Regine.

Nakaipon daw lahat ng kinikita ni Nate sa mga endorsement, pero hindi nito alam na may bayad ang pagharap niya sa camera.

Paliwanag ni Regine, “Hindi ko sinasabi kasi ayokong mag-isip siya.

“Ayokong pumasok sa ulo niya na lahat puwede niyang bilhin because may pera siya.

“Later on, when he’s a little bit bigger and he can understand already what it means, then I can tell it to him.”

Pero binibigyan niya ba ng reward si Nate?

“Hindi kasi kami reward system, e, hindi kami naniniwala doon sa if you do good, bibigyan kita ng ganito.

“E, di lagi na lang ganun, parang namimihasa, parang laging may kapalit.

“So, kami, ‘You have to be a good boy because I say so,’” pabirong sabi ni Regine.

Nabaling tuloy ang tanong ng press kay Nate.

Is he a good boy?

“Yes, po,” magalang na sagot ng bata.

Nakausap ng PEP.ph (Philippine Entertainment Portal) at iba pang press si Regine sa launching ni Nate bilang ambassador ng Smart Watch, ang multi-functional gadget para sa mga bata mula sa PLDT Home.

Ginanap ang launching at presscon nitong Miyerkules, Setyembre 7, sa Cerchio restaurant sa Scout Limbaga, Quezon City.

Incidentally, si Regine ang ambassador ng PLDT Home. Present din sa event ang PLDT vice president and Home marketing director na si Gary Dujali.

NOT YET. “Yes, po” ang sagot naman ni Nate nang tanungin ito kung artista na ba ang tingin niya sa sarili.

Pumapayag na ba si Regine maging artista rin si Nate?

“Ngayon lang ito kasi maliit pa siya, pero parang hindi naman din doon yung hilig niya.

“I’m glad na medyo aware siya sa industriyang ginagalawan namin ng tatay niya.

“It’s also good na alam niya na galing kami sa industriyang ito.

“Pero hindi ko masabi kung talagang ito yung gugustuhin niyang gawin.

“For me, sana hindi, kasi parang iba yung gusto niya… right now, ang mga hilig niya airplanes.

“He sings all the time, parang normal lang iyon sa kanya.

“That’s how I actually find him pag nasa bahay, sinusundan ko lang yung voice niya.

“Pero alam niyo kung sino ang hangang-hanga siya, kay Mang Tani [Nathaniel Cruz, GMA News weather forecaster].

“Super-kilala niya si Mang Tani kasi he loves weather, e, sobra siyang interested doon.”

Paano ginabayan ni Regine si Nate sa pagharap ng anak sa press?

“Sinabi ko lang may presscon, there will be people there.

“They will be asking you questions, are you okay with that? Okay naman siya.”

Inihanda rin daw ni Regine ang anak sa pictorial at TV commercial shoot nilang dalawa.

Aniya, “Ini-explain ko sa kanya na, ‘O, you’re working today,’ yung ganun lang, behave naman siya.”

Nagsalita rin si Nate at sinabing, “I enjoyed the playing.”

Singit ni Regine, “They’re playing there… parang naglalaro lang naman siya, hindi naman siya nagrereklamo.

“At saka he’s sobrang nice to work with… nag-e-enjoy lang siya, siyempre hindi mo maiaalis na bata siya.

“Pero pag sinabi mo sa kanyang, ‘You have to behave now, you have to take pictures now,’ he’ll ano… minsan alam ko pagod na .

“Pag pictorial paulit-ulit, ‘Mommy, I’m tired na.’

“‘Can you do just one more? Can you smile?’

“‘Okay, Mommy,’ mag-smile pa rin siya.

“He listens to me, he listens to Tita Dianne [kapatid ni Regine], he listens to the director.

“He listens talaga to the instructions, nagulat din ako na talagang he’s following the instructions.” -- For more showbiz news, visit PEP.ph