Mayor ng Sta. Magdalena, Sorsogon, pinasisibak dahil sa kwestiyunableng cash advances

Nagpalabas ng dismissal order ang Office of the Ombudsman laban sa alkalde ng Sta Magdalena, Sorsogon dahil sa umano’y kwestiyunableng mga cash advance na umaabot sa P8 milyon.

Sa ulat ng GMA News TV’s Balita Pilipinas Ngayon nitong Huwebes, sinabing pinasisibak sa puwesto si Mayor Alejandro Gamus dahil sa mga umano’y cash advance na umaabot sa P8 milyon mula Agosto 2004 hanggang Oktubre 2007.



Ang naturang halaga ay batay naman umano sa ulat ng Commission on Audit na hindi na-liquidate ng alkalde.

Hindi naman naisilbi ng Interior and Local Government (DILG) ang dismissal order dahil hinarang sila sa munisipyo.

Iginiit naman ni Gamus na hindi niya tatanggapin ang dismissal order dahil naabsuwelto na umano siya sa nasabing alegasyon.

Humingi na rin ang alkalde ng temporary restraining order sa korte para hindi maipatupad ang dismissal order. – FRJ, GMA News