Jackie Rice, 'di pa tiyak kung rarampa sa 'party' ng isang men's magazine dahil sa tampuhan nila ng ama

May tampuhan daw ngayon ang Kapuso star na si Jackie Rice at ang ama nito dahil sa pagpapa-sexy ng aktres sa indie movie niyang "Kamkam."

Sa "Starbites" ng GMA News TV's "Balitanghali" nitong Martes, sinabing ang dahilan ng tampuhan ng mag-ama ay ang mga daring love scene ni Jackie sa pelikula kasama si Allen Dizon.

Sa nabanggit na movie na dinirehe ng multi-awarded director na si Joel Lamangan, ginagampanan ni Jackie ang role ng isang bar girl na isa sa tatlong asawa ni Allen.



Dahil daw dito ay hindi dumalo sa special screening ng "Kamkam" ang daddy ni Jackie.

Present naman sa special screening ang ilang bida sa pelikula tulad nina Jean Garcia at Sunshine Dizon.

Dahil sa tampuhan, hindi pa raw sure si Jackie kung rarampa siya sa party ng isang men's magazine dahil baka lalong magalit ang kanyang ama. -- FRJ, GMA News