Barbers, Tupas abswelto sa Ombudsman

MANILA – Ibinasura ng Office of the Ombudsman nitong Biyernes ang magkahiwalay na kasong katiwalian laban mga gobernador ng Iloilo at Surigao del Norte at anim na iba pa dahil sa kawalan ng merito. Inabswelto ng Ombudsman sina Iloilo Gov. Niel Tupas Sr. at mga opisyal nitong sina Manuel Mejorada, provincial administrator; Levy Buenavista, executive assistant II; Elena Lim, budget officer; at Alma Ravena, acting human resource development officer. Sa hiwalay na desisyon, lusot din sa kasong katiwalian si Surigao del Norte Gov. Robert Ace Barbers at kapatid nito na dating gobernador ng lalawigan na si Robert Lyndon Barbers. Nabatid na isinampa ang kaso laban sa grupo ni Tupas noong Disyembre 27, 2007 ng People's Graft Watch of Iloilo Inc. Inireklamo ang gobernador at mga kasamahan nito ng “Prolonging Performance of Duties and Powers, Usurpation of Authority, Malversation of Public Funds, Falsification, and Violation of Section 3 (a) of Republic Act. 3019 (The Anti-Graft and Corrupt Practices Act)." Nag-ugat ang reklamo nang manatili umano sa pwesto si Mejorada bilang provincial administrator kahit natapos na ang ikalawang termino ng gobernador. Iginiit sa reklamo na ang posisyon ni Mejorada ay co-terminous sa panunungkulan ni Tupas. Subalit kahit tapos na ang termino ng gobernador ay patuloy umanong tumatanggap ng sahod at benepisyo si Mejorada at kasabwat umano rito ang gobernador at iba pang akusado. Ngunit sa 15-pahinang resolusyon ng korte, sinabi ni Ombudsman Ma. Merceditas N. Gutierrez, na si Mejorada, “is lawfully holding the position of Provincial Administrator" and consequently, “there is no prolonging of duties and powers, usurpation of authority, malversation of public funds, falsification and violation of Sec. 3(a) of Republic Act No. 3019." Ang kaso naman laban sa magkapatid na Barbers ay bunsod ng reklamo ni Elmer Hipolito, dating human resource management officer II ng Personnel Division ng Surigao provincial government. Reklamo ni Hipolito sa Ombudsman, inilipat siya sa pwesto ni Lyndon sa Pilar District Hospital pero ipinatupad pa rin ang kautusan nang pumalit na sa pwesto ang kapatid nitong si Ace noong Hulyo 2, 2007. Sa halip na sundin ang kautusan ni Barbers, nagpadala si Hipolito ng sulat sa Office of the Governor at Civil Service Commission (CSC) upang irekonsidera ang paglilipat sa kanya ng pwesto. Sa 14-pahinang desisyon ng Ombudsman, sinabing walaang masama sa ipinatupad na kautusan kay Hipolito at pinapahintulutan ito ng batas. “The evidence contained in the facts of the case does not demonstrate manifest partiality, evident bad faith or gross inexcusable negligence. The act of Governor Robert Ace S. Barbers, in issuing Officer Order No. 36, detailing complainant Hipolito to Pilar District Hospital is allowed. Presidential Decree 807, otherwise known as the Civil Service Decree of the Philippines allows transfer, detail and re-assignment," ayon sa pahayag ng Ombudsman. - GMANews.TV