Remonde pansamantalang papalit sa pwesto ni Ermita

MANILA – Magsisilbing acting Executive Secretary ngayong Sabado hanggang sa susunod na linggo si Press Secretary Cerge Remonde habang dumadalo sa official mission si Executive Secretary Eduardo Ermita sa Geneva, Switzerland. Sa isang pahayag ng Malacañang, sinabing itinalaga ni Pangulong Gloria Arroyo si Remonde bilang acting executive secretary mula Abril 25 hanggang Mayo 1. "I am pleased to transmit herewith your designation as Acting Executive Secretary for the duration of my official travel to Geneva, Switzerland on April 25 to May 1, 2009," nakasaad sa memorandum na ipinadala ni Ermita kay Remonde. Hindi naman nilinaw sa naturang pahayag ng Malacanang kung ano ang opisyal na misyon ni Ermita sa Geneva. - GMANews.TV