Suba sa Alimondian gin ab-ab sang tubig baha

Mga pumuluyo malapit sang Aganan River sakop na sang brangay Bancal sa banwa sang Alimodian hadlok sa padayon nga pagpang-ab-ab sa tubig baha. Indi na mahibalu-an sang 70 anyos nga si Luz Salvilla ang buhaton gani nagtinguha nga ipabalo sa Ratsada ang iya sitwasyon kaupod ang duha pa nga mga pamalay nga iya man pamilya. Gina ubos na sang ab-ab sang tubig baha ang duta nga ginapanag-iyahan sang iya napatay nga bana, kag amo lang ang ginakuha-an sang palangabuhi-an. Ang ginatudlo nga rason ni Salvilla amo ang wala untat nga pag quarry sa suba sang Aganan. Pati ang barangay kapitan nga si Joel Cuadra, nagakahangawa man sa sitwasyon subong sang iya pumuluyo malapit sa suba. Ginareklamo man ni Cuadra nga wala na subong naga agi sa barangay ang mga naga quarry ina bangud pag-abot nila sa lugar, naga posting na ang mga ini nga aprubado na sang Provincial Environment and Natural Resources Officer (PENRO) ang ila permit to quarry. Kon magpadayon nga magsige ang pagtupa sang madamol nga ulan sa kabukiran sang Alimodian, indi malayo nga maubos ab-ab ang duta kag pati ang mga pamalay diri. - Ratsada