Distrito na tatakbuhan ni Arroyo bilang kongresista binuhusan daw ng pondo

MANILA – Inakusahan ng isang kongresista si Pangulong Gloria Macapagal Arroyo na nagbuhos ng P459 milyon halaga ng infrastructure project sa ikalawang distrito ng Pampanga kung saan siya tatakbong kongresista sa darating na May elections. Naniniwala si Akbayan party-lit Rep. Risa Hontiveros, na may kinalaman sa pagtakbo ni Arroyo bilang kongresista sa naturang distrito ang ginawa nitong paglalaan ng mga proyekto. “That’s the most compelling reason why she should be disqualified from running. As the highest official of the land, virtually no one, not a sitting legislator and especially not an ordinary civilian like Mr. Adonis Simpao, can compete with the resources that she has at her disposal," ayon kay Hontiveros, kandidatong senador ng Liberal Party. Kabilang si Hontiveros sa mga naghain ng disqualification case laban kay Arroyo sa Commission on Elections (Comelec) na nakatakdang dinggin ngayong linggo. Tinawag ng kongresista na kalabisan ang ginawang paglalaan ni Arroyo ng malaking pondo para sa nabanggit na distrito kumpara sa ibinibigay na alokasyon sa ibang mambabatas. “She went thru a building frenzy, as if creating her own road to Congress, and perhaps, to the Prime Minister position that she obviously covets," idinagdag niya. Bagaman hindi umano labag sa batas na maglaan ng malaking pondo sa ikalawang distrito ng Pampanga, sinabi ni Hontiveros na isang “malaking kahihiyan" naman ang desisyon ni Arroyo na tumakbong kongresista sa lugar. Iginiit niya na hindi magiging patas ang laban sa posisyon ng kongresista sa ikalawang distrito ng Pampanga dahil nagagamit umano ni Arroyo ang pondo ng gobyerno para sa kanyang kandidatura. “She has shown in 2004 that she is willing to use her position to influence an election official and to mobilize the military to protect her votes. If she can use the funds of the government in a spending spree for her district, then nothing prevents her from abusing her powers to ensure her victory," ayon kay Hontiveros. Pork barrel fund Isa ang Priority Development Assistance Fund (PDAF) - na mas kilala bilang pork barrel fund – sa pinagkukunan ng pondo para sa proyekto ng mga mambabatas. Nitong Martes, kinastigo ng oposisyon kabilang si Sen Francis Escudero ang umano’y plano ng Malacanang na ipitin ang pagpapalabas ng pondo ng mga mambabatas na hindi kaalyado ng administrasyon. Ngunit ayon kay House Deputy Speaker for Mindanao Rep. Simeon Datumanong, ang probisyon sa 2010 budget para sa “pork impoundment" ay makatutulong para natukoy ang mga paglalaanang proyekto. “On the contrary, the prohibition is expected to promote greater transparency and understanding between the executive and the legislative. As reported, the President will send a notice to Congress about her decision to defer the release, temporarily or permanently, of an appropriation item, and Congress will subsequently act on it," paliwanag ng kongresista. Pinaalalahanan din ni Datumanong ang mga kritiko ng gobyerno na nasa kapangyarihan ng Kongreso kung papaano gagamitin ang pondo ng pamahalaan. Nilinaw din ni Quezon Rep. Danilo Suarez, pinuno ng House committee on oversight, na hindi garantiya na si Arroyo ang makikinabang sa probisyon dahil nakatakda na itong bumaba sa kapangyarihan sa Hunyo. “That’s unfair to the President and her successor whoever he will be. Such statement is an overreaction and exaggeration on the part of critics. We fully trust the wisdom, prudence and judgment of the members of the bicameral conference committee who worked on the final budget measure," ayon kay Suarez. Hindi rin umano dapat husgahan kaagad ang bagong mekanismo dahil hindi pa ito naipatutupad dahil hindi pa napipirmahan ni Arroyo ang 2010 budget na pinagtibay ng Kongreso. – GMANews.TV