Kritisismo na pabago-bago ng desisyon si PNoy wala raw basehan

MANILA – Wala umanong basehan ang mga espekulasyon na pabago-bago ng isip o may nagdidikta sa paggawa ng desisyon ni Pangulong Benigno “Noynoy" Aquino III tungkol sa kanyang Gabinete. Iginiit nitong Sabado ni deputy presidential spokesperson Abigail Valte na walang direktang naging pahayag si Aquino na papalitan niya si Jesse Robredo, acting secretary ng Department of Interior and Local Government (DILG). “There is no need to go into speculation that someone is making decisions for him, the president makes his own decisions," pahayag ni Valte sa panayam ng dzRB radio. Nagkaroon ng mga hinala na hindi si Aquino ang nagpapasya sa usapin ng mga miyembro ng kanyang Gabinete bunga ng isang panayam ng pangulo sa telebisyon noong Huwebes kunsaan ay nagpahiwatig siya na magkakaroon ng pagbabago sa DILG. Bukod dito, sinabi ni Aquino na ipapalit niya ang isang kasapi sa partido (Liberal Party) kay Ramon Paje, na acting secretary ng Department of Environment and Natural Resources (DENR). Bagaman walang tinukoy na pangalan, pinapaniwalaan na si dating Bukidnon Rep. Juan Romeo Nereus “Neric" Acosta ang tinutukoy ni Aquino. (Basahin: PNoy masaya sa trabaho ng kanyang Gabinete) Si Acosta ay kasama sa senate ticket ng LP sa katatapos na May 2010 national elections pero natalo. Inaasahan na pinapalipas lang ni Aquino ang “one year ban" sa mga natalong kandidato bago ito italaga sa DENR. Ayon kay Valte, kaagad naman umanong nilinaw ni Aquino ang naging pahayag niya sa panayam sa telebisyon sa pamamagitan ng ipinadalang text message na nagsasaad na, "no plans of transferring (Robredo) anywhere." “After the entire thing [sa panayam noong Huwebes), people made conclusions on what the president said. [But] he did not make a conclusion," pagdiin ni Valte. – GMANews.TV