Holiday Bus, gisunog sa armadong grupo sa Sta. Cruz, Davao del Sur

STA. CRUZ, DAVAO DEL SUR – May 22, alas otso sa gabii, Gi-atangan sa sa matud pa myembro sa New poples Army kining Holiday bus nga gikan ug Davao ug padulong sa General Santos City, dunay plate number LXA – 820 kilid sa highway sa Barangay Astorga, Sta Cruz Davao del Sur. Tulo ka mga armadong lalaki kinsa naka-uniporme ug sundalo ug nakapurong ang mga nawong ang misaka sa bus ug gipakanaug ang tanang mga pasahero. “Ingon tong tawo nga “baba mong tanan!", wala nami kabalibad kay laliman ka, pusil ang itutok sa imo, napakapurong sila, dunay purong ang nawong, nangahadlok gyud mi , puno gud ang bus naa pa gani nanindog", saysay ni Beatriz Bajao, usa sa mga pasahero sa bus. Ang driver sa bus nga si Charlie Enero ug konduktor niini daling misibat human gihurat matud pa sa mga armadong tawo. Dayon gibu-buan sa mga lalaki ug gasolina ug gisunog ang bus. “Gitawagan ko sa conductor nga giharang daw sila, gipagawas ug gisunog ang bus, nakuyawan pud to sila mao tong daling misibat", saysay sa mirespondeng inspector sa Holiday bus nga si Norman Pisawis. Gidungag sa wala nagpailang pasahero nga “nakita nako nga daghang mga armado gawas sa bus, ang uban nanghupo sa kasagbutan, basta duna silay bitbit nga pusil." Sa unahang bahin, nahimutang ang Astorga Elementary School diin gihimo kining detachment sa Davao del Sur Public Safety Company, sayud kuno sila nga dunay dili maayong nahitabo apan wala na sila midasdas sanglit dehado sila sa tawo. Matud ni Lt. Col. Oliver Artuz sa 39th Infantry Battalion nga mas maayo nga wala dayon miatraka ang tropa sa kapulisan sa maong hitabo sanglit posibleng “trap" lang kuno sa armadong grupo ang nahitabo. “Amo pang tanawon kung kinsang tropa sa New Peoples Army ang mibuhat niini, pero posibleng extortion ang motibo", dugang ni Artuz. Gibutangan ug detachment ang maong lugar human tulo ka bulan ang nakalabay nagpahigayon ug kaugalingong “checkpoint" ang NPA pipila lamang ka metros sa lugar diin gisunog nga bus. “Ang nakakaawa itong mga pasahero kasi marami sa kanilang mga gamit ang kasamang sinunog ng NPA tapos takot na takot sila", saysay ni P/Supt. Querubin Manalang, Commander sa Davao del Sur Public Safety Company kinsa miresponde human sa panghitabo. Apil ang 39th IB nga miabot sa lugar ug gi-asikaso ang daghang mga pasahero nga nangahadlok sa ilang gidangatan. Sa mga balay duol sa lugar midayon ang mga pasahero. Sa kilid sa kalsada asa gisunog ang bus, dunay kasagingan diin sumala sa mga residente lahos kini sa quarry site ngadto na sa bukid sa Barangay Rizal nga mao kunoy gi-agihan sa pagsibat sa NPA. Wala pa giangkon o gihimakak sa NPA ang maong insidente. Abli sa kanunay ang GMA News alang sa kabahin sa rebeldeng pundok.