Isyu Karon: Tara, mag-bike 'ta!

Kung buot nimo makalingkawas gikan sa kabaga sa dagan sa trapiko ingon man naninguha ug kagawasan gikan sa padayong pagsaka sa presyo sa lana, adunay solusyon alang niana: bisikleta! Gawas nga makatabang kini sa atong kinaiyahan, dakong benepisyo usab sa atong panglawas. Dayag gayud ang interes sa mga Dabawenyo pag-abot sa sport nga “cycling".Gani, ang syudad sa Davao nagpabiling usa sa mga pinaka-aktibong “biking community" sukad pa kaniadto, ug hangtud karon mas nidaghan pa ang ihap sa mga “biking enthusiasts" dinhi sa siyudad. Si Ed Leuenberger, Jr., kwarenta’y kwatro anyos, kinsa kanhing RP Team Coach ug kanhing Presidente sa Davao All-Terrain Bikers Association kon DATBA, 24 na ka tuig gasalmot ug cycling ug sumala niya kini usa ka talagsaong kasinatian. “Up to this day, wala pa ko gikapoy. Always naga-look forward ko. Mostly, ma-experience nako ug ma-feel nako akong childhood when biking. Pag mo-ingon ka ug bike, makasulti ka ug bata di ba? It’s a kid’s play ang bike eh. Makita nimo ang memories nimo during childhood pag nagabike ka. It’s bringing back memories sa pagkabata gyud", sumala pa Leuenberger. “It’s a balancing act. More of freedom, exploring new places bisag asa ka makaadto, dili nimo mapansin nga it’s more on exercise ang mahatag sa lawas, dili lang suroy but at least naay health benefits", dugang pa niya. Si Allan Gomez, 33 anyos, kinsa dili lang usa ka “bike enthusiast" apan tungod bililhon man alang kaniya ang bisikleta, nahimo usab niya kining panginabuhian. Negosyo nga sayud siya may dakong kaayuhan nga ikadalit sa katilingban. “Nagstart ako sa bike dahil sports ko ‘to, passion ko ‘to. Nagbibisikleta talaga ako at nagstart ako sa BMX then nauso ‘yong mountain bike. I started mountain biking, after that marami na akong kakilala na naghahanap ng parts, so I decided na maglagay ng bike business", saysay ni Gomez nga namaligya ug hardware parts sa bisikleta. Kung kining bisikleta nahimong negosyo alang sa pipila, ug nahimong instrumento alang sa kabag-ohan, lahi ang kaayohang hatud niini alang sa atong mga kaigsuonang trisikad driver. Sagad kanila mga amahan kinsa may pamilyang gibuhi ingon man may mga batang gipa-eskwela, apan alang sa usa ka inahan kinsa nagkugi alang sa kaugmaon sa iyang mga anak, dako ang iyang pagtuo nga pinaagi sa pagbisikleta, mapakaon niya iyang pamilya kutob sa iyang makaya. “Wala nakoy laing pangita, mao lang man gud ni akong nahibal-an", matud ni Mirasol Silab, usa ka trisikad driver. Sulod sa usa ka adlaw, dako na ang iyang kalipay kung mokita siya ug usa ka gatos ka pesos. Igo na kuno kini aron may mapakaon siya sa iyahang mga anak. Kulang man apan mapasalamatun na lamang siya sanglit ang importante kuno dili sila mapasmo. Apan sa panahon karon nga de motor na ang kadaghanan sa mga sakyanan, ug ang pagsakay sa trisikad posible nga makalangan lang padulong sa nagkalain-laing destinasyon, unsa na lang ang mahitabo sa panginabuhian ni Mirasol? “Mag-trisikad lang gihapon ko, maningkamot gyud para sa akong pamilya", dugang pa niya. Sa simpleng pamilya ni Mirasol, naninguha gayud siya nga mahatagan niya ug maayong kaugmaon ang iyang mga anak kini subay sa limpyo ug sinsero nga pamaagi. Gawas nga nahimong panginabuhian sa mga Pinoy ang pagbisikleta, nahimo usab kining epektibong matang sa ehersisyo kung buot makabatun ug himsug nga panglawas. “It’s a very good exercise especially for the heart pero before you go into cycling, please get in contact with your physician on how far you should go, may mga limitasyon din yan eh and they have to wear the proper gears to prevent also accidents that might cause injury to your muscles", matud ni Davao City Health Officer Dra. Josephine Villafuerte. Bisikleta, dungan nato kining sakyan uban ang atong mga pangandoy. Pangandoy nga pagapuy-an ang hapsay ingon man himsug nga pamuyo ug tinguha nga maproteksyunan ang kinaiyahan sa bisan unsang hulga.