Court Sheriff Andres, gibalhin na sa kauluhan

Sa pagbisita sa GMA News Davao sa Regional Trial Court Branch 16 niadtong Agusto 1, bakante na ang lingkuranan ug lamesa ni Court Sheriff Abe Andres. Si Andres ang court sheriff nga gisumbag ni Davao City Mayor Inday Sara Duterte atol sa demolisyon sa Soliman Agdao, Davao City niadtong Hulyo 1. Gikumpirma mismo ni Clerk of Court Atty. Jocelyn Alibang-Salud nga gibalhin na nila si Andres apan wala kini nasayod kung asang korte kini nadestino. Gisulayan usab ug kuha sa GMA News ang kabahin sa Sheriff Confederation of the Philippines Davao City Chapter apan nagdumili magpainterview ang tigpamaba niini. Walay makakumpirma kung tinuod bang sa nakalabayng semana pa gibalhin si Andres sa kauluhan ug dili usab makumpirmang tungod ba kini sa nahitabong pagpanumbag ni Mayor Duterte. Samtang si Mayor Duterte, nasayod sa maong panghitabo ug wala na gayud sila nagkita ni Andres. “Wala ko kabalo and wala pud mi nagkaistorya. All I know about his transfer is katong nabasa nako sa newspaper pero at that time man gud dili pa ata sigurado", matud sa Mayor.