Mga unibersidad ng Pilipinas, ‘di nakapasok sa Top 400 list ng Times

Walang nakapasok sa mga unibersidad ng Pilipinas sa Top 400 Times World University Rankings sa 2011 – 2012. Ang listahan ay inilabas nitong Huwebes. Sa naturang listahan sa kategorya mula sa Asya, 16 na unibersidad ng Japan ang pasok sa Top 400, 10 mula sa China, walo mula sa Taiwan, pito sa South Korea, at tig-apat ang Israel at Turkey. Ang Indian Institute of Technology ang nag-iisang unibersidad ng India ang nakapasok sa Top 400. Nakapasok din ang Sharif University of Technology ng Iran, at Mahidol University ng Thailand. Ang University of Tokyo, University of Hong Kong, at National University of Singapore ang nanguna sa grupo ng 60 Asian universities sa naturang listahan ng Times World University Rankings (2011 – 2012). Samantala, naghari naman sa listahan ang California Institute of Technology (Caltech), at naungusan nito ang dating nangungunang Harvard University, na bumagsak sa ikalawang puwesto. Pangatlo naman sa listahan ang Stanford University. Nakapasok sa Top 400 list ang 75 unibersidad ng Amerika, habang 32 unibersidad naman ang nakapasok mula sa United Kingdom, tig-12 ang Germany at Netherlands at siyam sa Canada. “But when that table is adjusted for national spending on higher education, Switzerland has the most universities in the top 200 per billion dollars spent, followed by the UK in second place and the Netherlands in third. The US finishes 16th by this measure," ayon kay John Morgan, deputy news editor ng Times. Ang Times Higher Education World University Rankings (THEWUR) ay nabuo sa pakikipagtulungan ng data provider na si Thomson Reuters at mga eksperto mula sa "50 leading figures in the sector from 15 countries across every continent." “We believe we have created the gold standard in international university performance comparisons," ayon sa THEWUR. Ang 13 elemento sa pagsusuri sa kalidad ng mga unibersidad ay pinagsama sa limang pangunahing kategorya: - Teaching — the learning environment (worth 30 per cent of the overall ranking score); - Research — volume, income and reputation (worth 30 per cent); - Citations — research influence (worth 30 per cent); - Industry income — innovation (worth 2.5 per cent); and - International outlook — staff, students and research (worth 7.5 per cent). — FRJ/GMA News