Ika-20 taong anibersaryo ng trahedya sa Ormoc, ginunita

Ginunita nitong Sabado ang ika-20 taong anibersaryo sa naganap na matinding flashflood sa Ormoc City, Leyte na ikinasawi ng tinatayang 8,000 katao. Umaga nitong Sabado nang isagawa ang prusisyon sa Ormoc na dinaluhan ng mahigit 2,000 Ormocanon. Nagtungo sila sa sementeryo na ginawang mass grave ng mga nasawi sa trahedyang naganap noong Nov 5, 1991. Sa mass grave, isang misa ang idinaos at inalayan ito ng mga bulaklak at kandila. Inalis din ang kurtinang nakabalot sa ipinagawang istruktura na magsisilbing simbolo sa pinaglibingan ng mga biktima ng flashflood. Ang paggunita ay pinangunahan naman ni Ormoc City mayor Eric Codilla na siyang nagpaliwanag sa publiko sa mga nakaukit na marka sa ipinagawang simbulo ng trahedya. Dinaanan din ng prusisyon ang pinalapad na sapa na dinaanan noong rumagasang baha na nagpalubog sa malaking bahagi ng lungsod. Kasagsagan ng bagyong Uring nang maganap ang flashflood sa Ormoc na nagpalubog sa lahat ng barangay sa lungsod. -- R.Roa/FRJ, GMA News