Mga lumad, midagsa na sa downtown Davao aron mamasko

DAVAO CITY — Petsa-6 sa Disyembre pa naka-schedule nga sugdan ang Pasko sa Lumad sa City Government of Davao, kini mao ang pag-atiman sa mga mulugsong nga mga lumad sa dakbayan.   Apan Disyembre uno pa lang, 300 na ka mga lumad ang midagsa sa Calinan Gym aron magsugod na og panaygon ug mangayo og pinaskohan.   Matag Disyembre, magpunsisok gayud ang mga lumad sa mga nagunang gymnasium sa Davao City nga gihimong shelter area sa mga mulugsong nga lumad gikan sa lagyong dapit sa Davao ug kasikbit nga probinsya ug rehiyon.   Sa Calinan Gym, mga tribung Matigsalog, Ata ug Bagobo ang nagpundo.   “Murag naanad gani mi nga moanhi mi diri mao nga naglugsong na lang gyud mi atong petsa uno kay sa una, naghatag si Mayor (Inday Sara Duterte) sa amo ug bugas”, matud ni Jemma Mabilao sa Bagobo tribe.   Daghang mga bata ang anaa sa maong gym, sagad kanila mga nag eskwela pa, apan mi-absent na lang aron makalugsong.   Nag-agwanta ang maong tribu sa kalisud sa kahimtang sa gym tungod wala kuno silay mabuhat tungod sa kalisud sa panahon. Sa bukid kuno kung asa sila gikan, sunod-sunod ang kalamidad sama sa landslide hinungdan nga wala silay maharvest nga mga tanum nilang gulay ug ubang lagutmon.   “Wala gyud mi na-harvest bisag usa – balanghoy ug kamote wala gyud – bisan mais, mani, bisan unsa nga among tinanom, wala gyud”, saysay ni Angelita Intal, usa ka miyembro sa Matigsalog tribe.   Samtang sa kabahin sa Davao City Social Services and Development Office o CSSDO, ila gayud gisegurong maatiman ang mga mulugsong nga mga lumad sa downtown Davao. Duna silay ipanghatag nga libreng pagkaon matag adlaw hangtud na karong pasko.   Hinuon, giklaro ni CSSDO Head Maria Lourdes Bermudo nga wala nila gi-encourage ang mga lumad nga mulugsong sanglit dili gayud lalim ang kahimtang sa mga shelter area, apan dili gayud nila kini mapugngan, busa ila na lang kining atimanon.   Naandan usab sa CSSDO nga ihatud ang mga lumad ngadto sa ilang gigikanan inig kahuman sa Pasko. — GMA Davao