DOH Cebu dismayado sa pagsaka sa kaso sa stray bullets karong Bag-ong Tuig

Sa pagsulod sa Bag-ong Tuig daghan sa mga Pilipino ang gusto nga mawala na ang mga dili maayong kasinatian. Daghan ang mangita og mga pampa-swerte ug ang uban sama sa naandan, magsaba-saba gamit ang mga pabuto.   Karong tuiga nalipay ang DOH sa pag-ubos sa kaso sa mga nabuthan sa pagsugat sa Bag-ong Tuig. Kun itandi sa 48% niadtong 2011, nitala lang ug 45% ang mga nabuthan ning pagsugat sa tuig 2012.   Gitan-aw sa Department of Health nga epektibo ang kampanya kontra sa pagpabuto nga gitawag ug Action Paputok Injury Reduction o APIR.   Apan dili hingpit ang kalipay sa ahensya tungod nisaka ang insidente sa stray bullets karong tuiga ug 25%. Adunay walo ka kaso niini ang natala karong tuiga.   Ang Philippine National Police sa ilang bahin, misaad nga imbestigahan ang kaso sa mga stray bullets mapa lisensyado man o dili ang mga armas nga gigamit pagpabuto. — Ana Desamparado /GMA Cebu