12 ka Basket nga kontrabandong sisí nasakmit

Nasakmit sa Task Force Kalikasan ang dose ka basket nga sisí o barnacles nga ipayuhot unta sa gawas sa nasud gikan sa Barangay Suba Basbas sa Lapu-Lapu City. Mokabat sa P20,000 ang kantidad sa mga nasakmit. Giingong nabantayan sa mga nag-roving nga miyembro sa task force ang itom nga Toyota Town Ace nga adunay kargang mga basket nga gitabunan og sako. Pagsuta sa mga awtoridad, mga sisí ang sulod sa mga basket. Gikan sa Sorsogon ang mga nasakmit ug gipadala diri sa Cebu ngadto sa usa ka residente sa Barangay Cabancalan sa syudad sa Mandaue. Hingpit ang pagtuo sa kapulisan nga ipaagi kini sa Lapu-Lapu City una ipayuhot sa gawas sa nasud. Paborito nga adorno sa mga aquarium sa gawas sa nasud ang sisí. Gi turn-over ang mga nasakmit sa Environment Office sa syudad sa Lapu-Lapu ug gikatakdang sutaon sa mga opisyal sa Bureau of Fisheries and Aquatic Resources (BFAR). Matud ni Director Andres Bojos sa BFAR-7 sutaon pa nila ang matang sa sisí nga nasakmit ug kung mapamatud-an nga aduna’y kalapasan sa Wildlife Act ang nasakmitan niini, pasakaan sila ug tukmang kaso. — Cris Abayon with Gregy Magdadaro / GMA Cebu