Lain-laing sektor nagpreparar na sa Sinulog Grand Parade 2012

Nagkaduol na ang Sinulog Grand Parade 2012 ug ang mga nagkalain-laing sector hingpit na ang pagpangandam alang sa mabulukong okasyon.   Tunga-tungang bahin pa lamang sa Disyembre 2011, halos fully booked na ang hotel rooms sa Sugbo. Gani, sa pagsulod sa Sinulog week nagkuwang na ang 4,000 ka mga hotel room sa Sugbo bisan pa man og adunay daghang bag-ong hotels nga gibuksan.   Gawas sa early bookings, ang mga hotel midawat usab og booking fee aron sa pagsiguro sa mga bookings nga mosulod.   “It’s been a trend already. I noticed that most of our guests, the moment they checked out, they’ll already going to book for next year” pasabot ni Cenelyn Manguilimotan, Vice-President sa Hotel Resort and Restaurant Association of Cebu.   Tungod sa pagdagsa sa mga turista puspusan usab ang pag-preparar sa kapulisan ug mga local nga opisyal aron pagsiguro sa kahapsay sa Sinulog Grand Parade karong Enero 15.   Ang mga pulis, agi ug pag-familiarize na usab sa ilang mga poste, naglusad ug clean-up drive. Gilimpyuhan ug gi-ayo sa dul-an usa ka libong mga sakop sa PNP, mga sundalo ug mga volunteer ang rota nga agian sa parada.   Gipa-ambit ni S/Supt. Melvin Buenafe nga dako ug natabang ang clean-up drive di lang sa paglimpyo sa palibot apan lakip na sa pag-familiarize sa mga poste sa ilang personnel.   “This is opportune time na maipakita nato na ang Cebu City limpyo, hapsay ug malinawon. So kining activity makatabang pud, ma-exercise o ma dry-run ang atong deployment ug coordination sa mga involved” padayag ni Buenafe.   Sinulog Grand Parade   Gi-plantsa na usab ang higpit nga seguridad sa festival sa Dominggo. Gawas sa mga regular nga pag-ronda sa mga sakop sa Sinulog Task Force adsuna usab daghang paukyab sa grand parade karong tuiga.   Usa sa gikahinaman mao ang paghimo nga wi-fi zone sa rota nga again sa parade. Buot pasabot niini, ang mga dumuduong nga gusto nga i-share, i-tweet o i-broadcast ang ilang Sinulog experience, dali ra gayud kining mabuhat.   Apan nagpahimangno ang kapulisan nga mag-amping sa pagdala ug mga cell phones o gadgets sanglit mosiaw usab ang mga kiriwan ug kamot niining panahon nga magdasok ang mga tawo.   Ang grand parade karong tuiga langkuban sa 50 ka mga contingents gikan sa Cebu ug sa mga nagkalain-laing lugar lukop-nasud. — Chona Carreon, Nikko Sereno, Lou-Anne Mae Rondina, Alan Domingo, Jun Veliganio and Cris Abayon /GMA Cebu