Naguiat, ipatatawag sa Senado tungkol sa itinatayong Entertainment City

Hindi pa lusot si Philippine Amusement and Gaming Corporation (PAGCOR) Chairman Cristino Naguiat Jr., sa kontrobersiya tungkol sa itinatayong Entertainment City sa reclamation area sa Manila Bay. Nitong Sabado, naghain ng Senate Resolution No. 741, si Sen. Aquilino “Koko" Pimentel III, na humihiling na ipatawag sa pagdinig si Naguiat para alamin ang kalagayan ng naturang proyekto ng PAGCOR. “There is a need to look into the status of this Entertainment City Manila project from PAGCOR officials and from the executives of the four licensee companies themselves in order to find out if the project could and would deliver on its potential and promised or anticipated benefits," paliwanag ni Pimentel sa resolusyon. Sinabi ng senador na noong Abril 2008, ipinahayag ng PAGCOR ang plano nitong magtayo ng mala-Las Vegas na casino at tourism complex malapit sa Manila Bay na tinawag na “Entertainment City Manila." “Part of the justification for the said project is that it is expected to boost tourist arrivals in the country and generate new jobs as well, since the complex will feature six-star hotels, gaming facilities, malls, museums, cultural centers, sports arenas, residential villages and theme parks," ayon kay Pimentel. Apat na kompanya umano ang nabigyan ng lisensiya na magtayo, magmay-ari at magpatakbo ng integrated resorts sa Entertainment City Manila. Kabilang dito ang Travellers International Hotel Group; SM consortium; Tiger Resorts Leisure and Entertainment Inc.; at Bloomberry Resorts and Hotels Incorporated. Nangangailangan ng hindi umano bababa sa US$1 bilyong ang puhunan ng mga nabigyan ng lisensiya upang maisagawa ang proyekto. Ang itatayong integrated resort ay sinasabing may pinakamaliit na sukat na 250,000 square meters at 800 hotel room na may pangkaraniwang sukat na 40 square meter bawat isa. Noong nakaraang buwan, iniutos ni Pangulong Benigno “Noynoy" Aquino III kay Executive Secretary Jojo Ochoa, na imbestigahan ang alegasyon na tumanggap ng suhol si Naguiat mula sa Japanese businessman na si Kazuo Okada para mapaboran sa itinatayong Entertainment City. Ang alegasyon ay nakapaloob naman sa reklamong inihain sa US ng negosyanteng si Steve Wynn, na dating kasosyo, at ngayon ay karibal na ni Okada sa negosyo. (Basahin: No deadline on Naguiat probe — PNoy)-- ER/FRJ, GMA News