Firing squad sa heneral na nasa likod ng ‘Bataan Death March’

Kilala niyo ba kung sino ang Japanese military general na nasa likod ng ‘di malilimutang “Bataan Death March," na hinatulan ng kamatayan sa pamamagitan ng firing squad matapos ang World War II? Taong 1942 nang salakayin at sakupin ng puwersa ng Hapon ang Pilipinas sa pagsiklab ng ikalawang digmaang pandaigdigang. Nang bumagsak ang Bataan sa puwersa ng mga Hapon sa pamumuno ni Japanese general Masaharu Homma, libu-libung sundalong kinabibilangan ng mga Pinoy at Amerikano ang naging POW o prisoners of war. Sinasabing sa utos ni Homma, inilipat ng kampo o piitan at pinalakad ng mahigit 100 kilometro ang tinatayang 80,000 POWs mula sa Bataan, Pampanga at Tarlac – na tinawag na “Bataan Death March."

Basahin: Still waiting for benefits, RP war veterans recall their ordeals Sa layo ng paglalakad, kakulangan ng pagkain at inumin, tinatayang mahigit 10,000 POWs ang namatay sa hirap sa naturang paglalakbay. Ang ibang natutumba sa hirap ay sinasabing sadyang pinatay na rin ng mga Hapon. Nang bumagsak ang puwersa ng mga Hapon noong 1945, bumalik sa Japan si Homma pero dinakip siya at nilitis ng military commission sa Maynila dahil sa kasong pagmamalabis noong panahon ng digmaan. Abril noong 1946 nang bumaba ang hatol na kamatayan kay Homma sa pamamagitan ng firing squad. Sa utos ni General Douglas MacArthur, ipinatupad ni Lt.Gen. W.D. Styer ang hatol at binaril si Homma sa Los Baños, Laguna. -- FRJimenez, GMA News