Plake bilang pagkilala sa Palawan underground river ilulunsad sa Sabado

Pangungunahan ni Pangulong Benigno Aquino III ngayong Sabado ang paglulunsad ng isang 100-kilong plake na sisimbolo sa pagkilala sa Puerto Princesa Underground River (PPUR) sa Palawan bilang isa sa New Seven Wonders of Nature (N7WN). Isang plake rin ang nakatakdang ilunsad ng New Seven Wonders of the Nature Foundation, organizer ng naturang kumpetisyon. Kaugnay nito, inatasan ni Executive Secretary Paquito Ochoa Jr. ang lahat ng mga manggagawa ng pamahalaan at mga ahensya na magbigay ng buong suporta at partisipasyon sa mga nakahandang aktibidad para sa PPUR. Sa Memorandum Circular No. 29 na pinirmahan noong Abril 12, inatasan ni Ochoa ang lokal na pamahalaan na magbigay tulong sa PPUR-N7WN Campaign Task Force, na namumuno sa inaugural ceremonies na magaganap sa One Esplanade sa Pasay City ngayong Abril 21. “It is only necessary that all of us give due acknowledgment and appreciation to the PPUR, which is now among the N7WN, through an inauguration ceremony,” inihayag ni Ochoa nitong Huwebes.   “Our campaign in making the PPUR as one of the world-famous tourist spots in our country was a success and we anticipate that it will further attract international interest as well as boost tourism and investment that will benefit our country,” dagdag niya. Inatasan na ng Executive Secretary ang mga pinuno ng Department of Public Works and Highways (DPWH), Metro Manila Development Authority (MMDA), National Historical Commission of the Philippines (NHCP)  at ng Philippine National Police (PNP), at iba pa, upang magbigay tulong sa PPUR-N7WN Campaign Task Force sa magaganap na inaugural activities. “Subject to prescribed budgetary guidelines and government auditing rules and regulations, all government agencies concerned are authorized to allocate funds from available sources to cover the operational requirements for the conduct of activities,” ani Ochoa. Sa unang bahagi ng taon, opisyal na kinilala ng Switzerland-based N7WN Foundation ang PPUR bilang isa sa New Seven Wonders of Nature, na inaasahang maglalagay sa Palawan sa international tourist map. Inilarawan ng foundation ang Puerto Princesa Underground River—na matatagpuan 50 km hilaga ng lungsod ng Puerto Princesa— na mayroong “limestone karst mountain landscape” at ilang malalaking chambers kung saan makikita ang maraming stalactites at stalagmites. Sa Proclamation No. 182 na inilabas noong Hunyo 3, 2011, idineklara ang national at international na kampanya bilang suporta sa PPUR bilang nag-iisang entry ng Pilipinas sa paghahanap ng N7WN. Binuo rin ang PPUR-N7WN Campaign Task Force, na namuno sa active voting campaign na nakatulong sa pagsama ng PPUR sa N7WN. — Amanda Fernandez/KBK, GMA News