Nagsisiyasat sa mga inirereklamong kongresista, pumanaw na

Pumanaw nitong Martes sa ospital dahil sa pneumonia si Bohol Rep. Erico Aumentado, kasalukuyang pinuno ng committee on ethics sa Kamara de Representantes. Sa impormasyon na ipinalabas ng Kamara nitong Miyerkules, sinabing binawian ng buhay si Aumentado,72-anyos, habang nakaratay sa St. Luke’s Medical Center sa Global City, Taguig. “The country lost one of the most exemplary public servants," ayon kay Speaker Feliciano Belmonte, Jr. "“He was a very dear friend for whom I had the highest respect both as a colleague in Congress and in the writing profession." Ang Ethics committee ang lupon sa Kamara na nagsisiyasat sa mga usapin at reklamo laban sa mga nakaupong kongresista. Kabilang sa pinakahuling usapin na tinalakay ng komite ay ang pagkakasangkot sa usapin ng iligal na droga ni dating Ilocos Sur Rep. Ronald Singson. Si Aumentado rin ang nanguna sa pagbuo ng bagong patakaran sa pagpapalabas ng kopya ng Statement of Assets, Liabilities and Net Worth (SALNs) ng mga kongresista, at maging opisyal at kawani ng Kamara, na nakabinbin pa sa plenaryo. Bukod sa pagiging kongresista (2010;1992-2001), naging gobernador din si Aumentado (2001-2010), bise gobernador (1988-1992) at Provincial Board Member (1967-1980; 1984-1986). Isa ring abogado at dating mamamahayag ang namayapang mambabatas. "He deserves full credit for transforming Bohol into one of the most progressive, peaceful and richest provinces today. He was truly an outstanding solon -- learned, dedicated, and principled. A gifted writer and newspaperman, Eric pursued his crusading spirit in politics, faithful to his oath and to the highest standards of public service," ayon kay Belmonte. "Throughout all his four terms as congressman, three terms as governor, as well as his earlier stints as vice governor and member of the provincial board, Eric’s integrity and honor have never been in doubt. He died a poor man because he never made politics the source of his livelihood. He was a very dear friend for whom I had the highest respect both as a colleague in Congress and in the writing profession," dagdag pa ng lider ng Kamara. Sa media advisory ng House of Representatives Inter-Parliamentary Relations & Special Affairs Bureau, sinabing magdaraos ng Requiem Mass at necrological services sa Kamara para sa pumanaw ng kongresista sa Huwebes ng umaga. Inihayag naman ni Deputy Executive Director Corazon Alano, ng House Secretary General’s Office, kabilang sa mgasasalita sa necrological service ay sina Belmonte, House Minority Leader and Quezon Rep. Danilo Suarez, Occidental Mindoro Rep. Ma. Amelita Villarosa at Bohol Rep. Arthur Yap. Nitong Agosto, pumanaw din dahil sa sakit ang ama ni Sen. Francis Escudero na si Sorsogon Rep. Salvador Escudero III. Siya ay 69-anyos. Sa nasabi ring buwan pumanaw ang 83-anyos na si Zambales Rep. Antonio Magsaysay Diaz dahil sa multiple organ failure secondary to sepsis and pneumonia. Sa ospital naman sa London pumanaw si Negros Occidental Rep. Ignacio “Iggy" Arroyo noong nakaraang Enero. - RP/FRJ, GMA News