EPIRA law, rerepasuhin na kasunod ng patuloy na pagtaas ng singil sa kuryente

Mismong ang tagapangulo ng House Committee on Energy ang humirit na repasuhin ang Electric Power Industry Reform Act (EPIRA) of 2001 para malaman kung anong benepisyo ang naidulot ng nasabing batas sa mga mamamayan. Inihayag ni Negros Oriental Rep. Reynaldo Umali, ang hangarin na repasuhin ang EPIRA law nitong Miyerkules sa isinagawang pagpupulong ng pinamumunuan komite, at pagkaraan ay nagsagawa ng talumpati sa plenaryo ng Kamara de Representantes. “Mr. Speaker, let us look back at June 2001, the final days of the outgoing 11th congress, when Republic Act 9136, the Electric Power Industry Reform Act or EPIRA, held so much promise and raised very high hopes for the country’s electricity consumers,”  pahayag ng kongresista sa kaniyang talumpati. Basahin: PSALM seeks approval for power rate hike “Three months and twelve years after the passage of EPIRA, it is now time for us to make an honest and truthful assessment of how far the promised reforms have gone, and how much benefits and returns have been realized from our investments in a reformed and restructured power industry,” giit niya.   Inihayag din ni Umali ang pangangailangan sa pagrepaso sa EPIRA law para makahanap ng mas murang pagkukunan ng enerhiya na kakailanganin sa pag-unlad sa mga kanayunan.   Paliwanag ng kongresista, sa kabuang 62 billion per kilowatt hour (kWh) na konsumo ng kuryente bawat taon, ang bawat sentimo sa pagtaas sa singil at mangangahulugan umano ng karagdagang P620 milyon sa mga kumokonsumo ng enerhiya. Kung sisingilin umano ang naturang konsumo sa halagang P13 per kWh ngayon, lalabas ang  tinatayang P806 bilyon na kita ng industriya, patuloy pa ni Umali. Pinuna rin ng kongresista ang lumabas na mga ulat na ang Pilipinas ang may pinakamahal na singil sa kuryente sa Association of South East Asian Nations (ASEAN) at kabilang sa top 10 sa buong mundo. Nitong nakaraang buwan, nagpetisyon ang Power Sector Assets and Liabilities Management Corporation PSALM sa Energy Regulatory Commission para sa power rate hike na P0.1274 per kilowatt/hour sa loob ng dalawang taon. Ayon kay PSALM president Emmanuel Ledesma Jr., ang hinihinging dagdag singil sa kuryente para sa stranded contract costs ng NAPOCOR mula 2011 at 2012 na umaabot umano sa P17.685 bilyon. -- RP/FRJ, GMA News