Pagtuturo ng mga guro, nais gawing 6 na oras na lang bawat araw sa halip na 8

Isang panukalang batas ang inihain sa Kamara de Representantes upang limitahan lamang sa anim na oras ang pagtuturo ng mga guro sa mga pampublikong paaralan sa buong bansa.

Sa House Bill (HB) No. 2684, na inihain nina dating Pangulo at ngayo'y Pampanga Rep. Gloria Macapagal-Arroyo at anak niyang si Camarines Sur Rep. Diosdado “Dato” Arroyo, sinabing dapat bigyan ng "break" ang mga guro na kasalukuyang nagtuturo sa loob ng walong oras bawat araw.

“While teachers’ pay has been increased by recent enactments of law, they still desire higher pay and shorter working hours.  Their present work schedule has left them stressed out and exhausted much to the detriment of our students,” paliwanag nila.

Sa ilalim ng panukala, ililibre ang mga guro sa mga pampublikong paaralan sa eight-hour workday na itinatakda ng Civil Service Rules para sa mga government worker.

Nakasaad sa panukala na kapag humigit sa anim na oras ang pagtuturo ng mga guro, maaari silang mabigyan ng karagdagang kompensasyon na katumbas ng twenty-five percent ng kanilang sahod.

"Section 3 of the bill states that, 'any teacher engaged in actual teaching may be required to render more than six hours of teaching upon payment of additional compensation at the same rate of his/her regular plus at least twenty-five percent of his/her basic pay,'" paliwanag sa panukala. -- RP/FRJ, GMA News