Solong mananaya, tinamaan ang mahigit P215M jackpot sa Lotto 6/55

Isang masuwerteng mananaya ang nakatama sa winning combination ng Grand Lotto 6/55 draw nitong Sabado ng gabi, Hunyo 28, na may jackpot prize na umabot sa P215.867 milyon.

Sa website ng Philippine Charity Sweepstakes Office (PCSO), lumitaw na ang winning combination ng Grand Lotto 6/55 draw ay: 04-52-55-38-46-08.

Hindi nakasaad sa lotto result sa website ng PCSO kung saan nanggaling ang solong nakatama sa kombinasyon ng 6/55 draw.

Kasabay nito, isa ring masuwerteng mananaya ang nakatama sa winning combination sa isa pang draw nitong Sabado ng gabi na Lotto 6/42.

Ang tumamang kombinasyon ay: 27-01-29-04-06-18, na may papremyong mahigit P17.962 milyon.

Ang pinakamalaking papremyo na tinamaan ng solong mananaya sa lotto ay nangyari noong Nobyembre 2010 na umabot sa P741.176 milyon. -- FRJ, GMA News