Pacquiao bagsak sa unang bilangan ng NAMFREL

Nangunguna sa bilangan ng boto sa pagka-kongresista sa General Santos City si reelectionist congresswoman Darlene Antonino Custodio, ayon sa ulat ng radio dzBB Martes ng umaga. Sa inisyal na election quick count ng National Citizens' Movement for Free Elections (Namfrel/PPCRV), nakakuha si Custodio ng botong 7,131 kumpara sa 3,840 boto ni boxing hero Manny Pacquiao. Si Custodio ang kandidato ng Genuine Opposition (GO), habang si Pacquiao ang manok ng administrasyon. Maging ang boto sa pagka-senador ay dinenomina ng mga kandidato ng Genuine Opposition (GO) sa pangunguna nina Panfilo Lacson. Sinundan siya nina Francis Escudero, Loren Legarda, Noynoy Aquino, Alan Peter Cayetano, Antonio Trillanes, Sonia Roco, Mannuel Villar, John Osmena, Aquilino Pimentel, Miguel Zubiri at Edgardo Angara. Napag-alaman din na 30 porsyento ng mga botante sa GenSan ang hindi nakaboto dahil hindi makita ang kanilang mga pangalan sa opisyal na listahan ng botante. - GMANews.TV