Eroplano, puwede nang lumapag sa gabi sa Laguindingan airport sa Northern Mindanao

Naganap na nitong Huwebes ng gabi ang kauna-unahang scheduled night flight arrival ng eroplano sa Laguindingan Airport sa Misamis Oriental.

Sa ulat ng GMA News, sinabing ang unang eroplano na nag-landing ng gabi sa nabanggit na paliparan dakong 7:47 p.m. ay ang Cebu Pacific flight 5J-211.

Umaasa ang regional director ng Department of Tourism Region 10, na malaki ang maitutulong ng night flights sa paglago ng turismo sa lugar.

Kaabay nito, inaasahan din na magkakaroon na ng night flights ang ibang airlines sa mga susunod na linggo.
 
Sa isang pahayag naman ng Cebu Pacific, nakasaad na ang eroplanong lumapag sa Cagayan de Oro ay galing sa lalawigan ng Cebu.
 
"Navigational equipment for night operations had been installed at the Laguindingan Airport in November last year. After a series of technical reviews and consultations with relevant aviation authorities, including the Civil Aviation Authority of the Philippines (CAAP) and the Department of Transportation and Communications (DOTC), the Laguindingan Airport has been declared ready to accommodate night flights," ayon sa pahayag. -- FRJ, GMA News