Unang Tagalog version ng Pabasa

Pinaniniwalaang nagsimula pa noong 16th century ang "Pabasa" o "Pasyon" na naririnig  tuwing Semana Santa dahil na rin sa impluwensiya ng mga mananakop na Kastila. Kilala ba ninyo kung sino ang sumulat ng kauna-unahang Tagalog version ng pabasa?

Dahil karaniwang nasa Latin ang misa noon ng mga paring Kastila, narinig umano ng mga Pilipino ang kuwento ng buhay ni Hesukristo sa wikang Tagalog nang magawa ang unang Pasyon sa Tagalog na isinulat ni Gaspar Aquino de Belen noong 1704.

Si De Belen, ay isang Batangeno, manunula, at naging tagasalin o translator ng mga paring Heswita.

Ang pasyon na isinulat ni De Belen ay may titulong, “Mahal na Passion ni Jesu Christong Panginoon Natin na Tola."

Ang pasyon ay pag-awit ng patula sa buhay ni Kristo na ginagawa tuwing Semana Santa.

Sa isang ulat ng GMA News, pinaniniwalaan na ang tradisyon ng pasyon o pabasa ay sadyang nagsimula sa Pilipinas. Hindi umano kabilang sa liturgy ng simbahan o wala sa mga bilin na dapat gawin tuwing Semana Santa ang pabasa.

Naniniwala si Fr. Francis Lucas, executive director ng CBCP-Episcopal Commission on Social Communication and Mass Media, na ang pag-usbong ng pasyon ay likha na rin ng sadyang pagiging mahilig sa awitin ng mga Pilipino noon pa man.



-- FRJ, GMA News