46 drug cases ‘nahanaw' sa Cebu City prosecutor’s office

Gimando na sa Cebu City prosecutors office nga susihon ang gikatahong dunay dul-an 50 ka mga drug-related cases nangawagtang diha sa ilang buhatan. Naukay ang prosecutors office Huwebes dihang nigawas sa pamantalaan nga dunay 46 ka mga dokumento sa drug-related cases ang nahanaw. Daling gimando ni prosecutor Nicolas Sellon ang pakisusi kabahin niini. Ang tinubdan sa balita giingong si Eli Espina, city hall employee, nga gibutang diha sa prosecutor’s office aron mo-monitor sa drug cases. Apan hugot nga gihimakak ni Espina nga siyay nibutyag nga dunay missing nga mga dokumento sa mga kaso kabahin sa droga. Iyang gipasabot nga nangayo lang kaniya’g papeles ang news reporter kabahin sa mga kaso, labi na ang way mga CBU number. Sa record ni Espina daghang mga piskal ang naapil sa listahan ang dunay mga kaso nga way CBU number. Apan matod sa pipila ka mga piskal napasaka na sa korte ang maong mga kaso nga way number. Si piskal Gubalane nga maoy usa sa gisangunan paghimog pakisusi nibutyag nga dili na kinahanglan pang susihon ang isyu kay tataw kaayong way nawagtang nga mga dokumento sa kaso. Iya lang hangyo sa tigbalita nga ayuhon unta pagtan-aw ang dokumento. Apan ang reporter nagmakuli paghatag ug reaksyon. Hinoon, iyang gibutyag pinaagi sa short messaging system (text) nga nagbasi lamang siya sa dokumento nga iyang gihuptan. - Balitang Bisdak