Luzon Grid, naka-red alert dahil manipis ang suplay ng kuryente

Isinailalim sa red alert status ang buong Luzon Grid  dahil, sa pagitan ng 1 p.m. at 3 p.m. nitong Biyernes, lumampas sa nakatakdang "peak-hour power reserves" ang pangangailangan ng mga consumer ng kuryente, pahayag ng National Grid Corporation.

Ibig sabihin ng red alert status, mashigit ang pangangailangan sa kuryente kaysa nakareserbang suplay.

"This is primarily because of the increase in demand which has been breaching the peak levels since Tuesday, because of the extreme weather condition," ayon kay Cynthia Perez-Alabanza, tagapasalita ng NGCP.

Kadalasan, sumusobra ang pangangailangan tuwing pagsapit ng ikatlong linggo ng Mayo. Pero sa ngayon, mas napaaga ang peak demand, pahayag ni Alabanza sa panayam ng GMA News Online.

"...The heat factor has caused a problem from the demand side, with the problems of some power plants a contributory factor. But the biggest factor is because of the heat," giit ni Alabanza.

Batay sa datos ng PAGASA, ang pinakamataas na heat index sa bansa sa kasalukuyang taon ay naitala sa linggong ito, na umaabot sa  "record-breaking" na 52.3°C bandang Cabanatuan sa Nueva Ecija noong Martes, April 12.

Sa isang hiwalay na pahayag, nagbabala ang NGCP lalong bababa ang reserves, 156 megawatts na mas mababa, pagsapit ng 2:00 p.m.

Ayon naman sa power distributor na Meralco, nagkaproblema ang mga hydropower plant gaya ng Kalayaan, Magat, at Botocan; pati na rin umano ang oil-fired na Malaya 1. Sumailalim sa emergency shutdowns ang mga plantang ito.

Dagdag pa, ang coal-fired Calaca 1 at 2 ay tumatakbo ng "limited capacity" at ang Pagbilao 1 naman ay isinailalim sa maintenance.

"Meralco is also advising the Interruptible Load Program (ILP) participants to prepare in case there is a need for them to operate their own generator sets to help reduce the over-all demand," dagdag nito. —LBG, GMA News