Alkalde ng Kiamba sa Sarangani, niregaluhan ng ulo ng tao

Isang pugot na ulo ng tao ang nakita sa tabi ng kalsada sa Kiamba, Sarangani. Ang ulo, may kasamang sulat para sa alkalde ng nasabing bayan.

Sa ulat ng GMA News TV's Balita Pilipinas nitong Biyernes, sinabi ng Kiamba police na nakalagay sa isang kahon ang ulo na may mensahe na regalo ito ng salarin sa alkalde.

Nagbabanta rin ang salarin na isusunod na raw ang alkalde at ang mga alaga niyang aso.

Dinala na sa punerarya ang ulo at inaalam ng mga imbestigador ang pagkakakilanlan ng biktima.

Inaalaman din kung sino ang nasa likod ng krimen, habang hindi pa nagbibigay ng pahayag ang alkalde. -- FRJ, GMA News