Paggamit ng social media, dapat rendahan —solon

 

Dahil umano sa pagdami ng mga kaso ng online bashing, iminumungkahi ng isang mambabatas na dapat i-regulate ang paggamit ng social media.

Sa ulat ni Tina Panganiban-Perez sa "24 Oras," sinabi ni Negros Oriental Rep. Arnulfo Teves Jr na dumarami ang online bashing at dapat umanong rendahan ng Department of Information and Communication Technology (DICT) ang paggamit nito ng aabot sa 48 milyong Pinoy Facebook users.

"I intend to make a bill. Sobra na kasi yung paninira ng mga tao through social media. Grabe yung bashing, hindi lang sa akin. Ang daming taong siniraan through social media," pahayag ni Teves.

"Ang request ko lang sana, i-regulate natin. Walang puwedeng mag-fake [ng] account. You can have as many accounts as you want but registered to your name. If you're found with an account not registered to your name, then you will be liable," giit niya.

Pero, wala umanong ahensya ng pamahalaan na nagre-regulate ng social media dahil hindi ito kabilang sa mga responsibilidad ng DICT.

"Actually yung social media po kasi, that would deal with content. We are just dealing with the technical side of the ICT," ito naman ang pahayag ni National Telecommunications Commission Commissioner Gamaliel Cordoba.

"Nakontrol ng China yung social media nila, bakit hindi natin magawa?" pahayag ni Teves

"It is a matter of accountability of those who use social media," tugon naman ni DICT Sec. Rodolfo Salalima.

Samantala, sinabi naman ng isang social media expert na kung makikilala ang may-ari ng social media account maaaring bababa ang mga insidente ng bashing.

"If you are identified, then you are less likely to engage in unlawful behavior," pahayag ni Atty. JJ Disini.

Dagdag niya, sensitibo ang isyu dahil maaaring makaaapekto ito sa freedom of expression.

"Titingnan nila yung karapatan ng mga tao na ma-express yung sarili nila, in comparison dun sa duty ng State, ng ating republika na protektahan ang mga mamamayan," ayon kay Disini. — LBG, GMA News