Cebu miabi-abi sa mga balikbayan nga mosaksi sa Sinulog

Sadya ug bibo ang pagsugat sa mga balikbayan gikan sa US buntag niining Huwebes didto sa Mactan International Airport. Rondalla uban sa pagsab-ong og lei maoy dalit sa mga sakop sa Sinulog Foundation og sa Department of Tourism (DOT) sa mga balikbayan. Gibana-bana nga kapin 100 ka mga balikbayan ang nanguli alang sa kapistahan ni Sr. Sto. Niño ug pagsaksi sa Sinulog grand parade. Mga balikbayan ug foreigners excited kaayo sa ilang pagbisita sa Sugbo. Dayag sa ilang mga panagway ang kalipay. Ang uban kada tuig na mag-ulian aron lang pagsaksi sa Sinulog. Alang sa uban, una kining higayon nga mosaksi sa tinuig parada isip mga balikbayan. Pag-abot sa baggage area adunay ni-serenade nga mga empleyado sa Mactan International Airport. Paggawas, gisugat na usab sila og Sinulog Dance. Matud ni Patria Roa, director sa DOT Central Visayas, mas midaghan ang mga turista nga midagsa alang sa Sinulog karong tuiga itandi sa milabayng 2007. Dako og ikatabang ang Balik-Cebu program sa ekonomiya sa Sugbo tungod kay uban sa mga balikbayan anhi na mo-invest sa ilang kwarta sa dakbayan. Seguridad Sa laing bahin, gipa-report sa Cebu City Police Office ang kapin 300 ka mga pulis aron mahibaw-an ang ilang mga tahas atol sa Sinulog. Kon napakyas ang mga pulis pag-attend sa briefing ug sa ilang buhaton atol sa parade, kasuhan sila og neglect of duty. Nagkita ang mga pulis nga gikan sa nagkalain-laing presinto ug special units alang sa katapusang pagpahibawo sa ilang mga tahas karong Dominggo. Kini ang unang higayon nga nagkatapok ang mga pulis nga mobantay sa Sinulog. Matod ni Sr. Supt. Patroncinio Comendador, police director sa Region 7, sayo nga gihimo ang general briefing kay lisod na kining himoon atol sa grand parade. Human sa general briefing, nihatag og instructions ang walo ka mga sector commander ngadto sa ilang mga sakop. Ala-sais palang sa buntag sa Dominggo, sugdan na sa pagpakatap og pulis ang carousel route ug mga lugar nga nagkinahanglan og seguridad. - Balitang Bisdak