4 patay, 29 samdan sa pamomba sa General Santos City

Upat ang kumpirmadong patay ug 29 ang samdan sa pagbusikad sa bomba sa General Santos City Huwebes sa gabii. Giklaro sa GenSan police nga dili car bomb, ingon man, dili motorcycle bomb ang nibusikad didto sa gawas sa PhilBest Canning Corporation sa maong dakbayan. Giila ang upat nga namatay nga sila si Chelly Velez, Cresencia Bidula, Mara Kamad ug Alberto Alajan. Kadaghanan sa 29 ka mga samdan mga trabahante sa naasoyng kumpanya, ug ang uban mga driver sa habal-habal ug mga sidewalk vendor. Wala pa masuta sa mga pulis kung kinsa ang nagpaluyo sa pagpamomba, apan duna na kuno silay mga anggulo nga gilantaw ug gikonsidera. Nasayran nga daghan ang mga nabiktima sa maong pagpamomba tungod kay ting-kobra og sweldo niadtong higayuna sa PhilBest. Nakadawat na ang mga pulis sa GenSan og hulgang pamomba sa wala pa mahitabo pagbusikad sa bomba sa PhilBest. Mismo ang mga pulis nibutyag nga usa ka semana ayha pa ang pagbusikad duna na silay nadawat nga mga report nga dunay bomba nga itanom sa siyudad. Apan pangutana, nganong nalutsan gihapon sila sa mga suspetsado? Namatikdan nga halos kada tuig may mahitabong pamomba sa GenSan ug ning tuiga, Enero pa lang, may nahitabo nang pamomba. - Testigo