Paggiba sa Torre de Manila, hiniling ng SolGen sa SC

Dumalo na sa oral argument ng kontrobersiyal na condominium building na Torre de Manila sa Korte Suprema nitong Martes si Solicitor General Florin Hilbay para ihayag ang pagsuporta sa panawagan na gibain ang binansagang "photo bomber" sa monumento ni Dr. Jose Rizal sa Luneta.
 
Sa naturang pagdinig, inihayag ni Hilbay sa mga mahistrado na nakasira ang naturang condominium building sa view ng rebulto ng pambansang bayani.
 
Bilang SolGen, si Hilbay ang legal na kumakatawan sa National Museum at National Commission for Culture and the Arts.
 
“The government is asking the Honorable Court to order private respondent DMCI to demolish Torre de Manila, an illegal construction, to the extent that it impairs the sightline of the Rizal Monument," ani Hilbay.

Ang petisyon laban sa Torre de Manila ay inihain ng Knights of Rizal, na unang humiling sa SC na ipatigil ang pagpapatayo, at kasunod ay paggiba sa condominium na itinatayo ng DMCI.

Hiniling din ni Hilbay sa SC na atasan ang lokal na pamahalaan ng Maynila at iba pang kinauukulang ahensiya ng pamahalaan na pangasiwaan ang pagsubaybay sa gagawing demolisyon ng gusali.

Paliwanag ni Hilbay, itinayo ang monumento ni Rizal sa lugar na walang dapat makasagabal sa hitsura ng kapaligiran nito.
 
“If the way to conserve a painting is by controlling the temperature of its environment, the way to conserve the Rizal Monument is by preserving its sightline,” anang opisyal.

Binigyan-diin din ni Hilbay na sa “conservationist and protectionist policies” sa ilalim ng Article XIV ng 1987 Philippine Constitution, hindi lang umano dapat  ang Motto Stella, ang orihinal na titulo ng Rizal Monument ang dapat na bigyan pangangalaga kung hindi maging ang "accompanying sightline" nito.

Dagdag pa niya, hindi awtorisado ang City Planning and Development Office na magpalabas ng zoning permit sa DMCI building. Wala rin daw bisa ang zoning permit ng DMCI dahil humigit ang gusali sa floor-to-area ratio.
 
Iginiit din ni Hilbay na tanging ang Sangguniang Panlungsod lamang mula sa rekomendasyon ng Manila Zoning Board of Adjustments Appeals ang may katungkulan na magpalabas ng permission for variance o exception sa zoning rules.

Ang kinakailangang permiso ay dapat nakuha umano ng DMCI “prior to conducting any business activity or construction on the[ir] property/land.”

"Given these facts and conclusions of law, what is apparent is that DMCI was less-than-prudent both in securing the required permits and in building Torre de Manila,” ani Hilbay.

"A diligent developer would have gone through the required processes under the Ordinance; it would not have built the Torre de Manila with undue haste,” dagdag niya.

Pananaw ng mga mahistrado

Kaugnay nito, nagpahayag ng pag-aalala sina Associate Justices Francis Jardeleza, Estela Perlas-Bernabe, at Antonio Carpio sa usapin ng pagdetermina at pagsukat ng "sightlines" sa tinatalakay na makasaysayang monumento.

Pero sinabi ni Hilbay na hindi niya hinihiling sa mga mahistrado na suriin ang sukat at hangganan ng "sightline" sa rebulto ni Rizal.

“But take judicial notice that sightline has already been impaired. The Rizal Monument is meant to be forward facing. Any reasonable person will not argue that the sightline has not been impaired,” anang opisyal.

Subalit tanong naman ni Carpio kay Hilbay, "You are asking us to say that it is illegal to put a Torre behind the park, but we don't know how far. We have to come up with a ruling that will guide the developers. You want us to legislate the sight line but not how far.”

Mungkahi ni Hilbay, maaaring gumawa ng patakaran sa hinaharap ang Kongreso at lokal na pamahalaan sa pagdetermina ng sight lines para sa cultural at historical sites. —FRJ, GMA News