Isang dating military officer ang balak ni Pangulong Rodrigo Duterte na ilagay bilang pinuno ng Department of Agriculture, na kapalit ni Secretary Emmanuel Piñol, na inilipat naman sa Mindanao Development Authority (MinDA).
Pero ayon sa pangulo, naghahanap pa siya ng kapalit ni Piñol sa DA.
“I’m scouting around. Maybe again a military man kasi madali mag-utos ng trabaho and they do it without a question,” sabi ni Duterte sa panayam sa television program ni Pastor Apollo Quiboloy nitong Miyerkoles.
“When I tell you do this and do that do not question me because I will never give you an order to do something that is illegal,” dagdag ng pangulo.
Binalewala ni Duterte ang mga puna na puro militar ang inilalagay niya sa kaniyang Gabinete.
Kabilang sa mga dating sundalo na itinalaga ni Duterte sa pamahalaan ay sina Interior Secretary Eduardo Año, Environment Secretary Roy Cimatu, National Security Adviser Hermogenes Esperon Jr., Peace Adviser Carlito Galvez Jr., Housing and Urban Development Coordinating Council chairperson Eduardo del Rosario at Social Welfare Secretary Rolando Bautista.
Samantala, ipinaliwanag ni Duterte na nais niyang maging point man niya si Piñol sa Bangsamoro Autonomous Region in Muslim Mindanao (BARMM).
“Nobody is talking to the BARMM. What else do you want? What else do you need? What happens to this office? Would it be dissolved or you want another entity to make it work? Wala eh so I have to have my man there. Piñol is from Cotabato,” ayon sa pangulo.
Nitong nakaraang linggo, nakipagpulong si Duterte sa mga opisyal ng Bangsamoro Transition Authority (BTA) na pinamumuan ni interim chief minister Murad Ebrahim kaugnay sa gagawin niyang paglalagay kay Piñol sa MinDA. -- FRJ, GMA News
