William Dar, ipinalit ni Duterte kay Piñol sa DA

Itinalaga ni Pangulong Rodrigo Duterte si Dr. William Dar bilang kalihim ng Department of Agriculture. Si Dar ang pumalit kay Emmanuel Piñol, na inilipat naman sa Mindanao Development Authority.

Kinumpirma ni Senador Christopher “Bong” Go, ang pagkakatalaga kay Dar, na dati na ring pinamunuan ang DA noong 1998 hanggang 1999 sa ilalim ng administrasyon ni dating Pangulong Joseph Estrada.

Sa hiwalay na text message, kinumpirma rin ni Executive Secretary Salvador Medialdea na may bago nang kalihim ang DA.

Si Dar ay isang horticulturist, ay naging director general ng International Crops Research Institute for the Semi-Arid Tropics (ICRISAT), isang organisasyon na nagsasagawa ng agricultural research in rural development, at may punong himpilan sa India.

Noong nakaraang buwan nang ianunsyo ni Duterte na nais niyang ilipat ng posisyon si Piñol para maging "point man" at tulay niya sa Bangsamoro Autonomous Region in Muslim Mindanao (BARMM).--FRJ, GMA News