Kaming mga OFW, bayani kung tawagin

KAMING MGA OFW, BAYANI KUNG TAWAGIN Ni Nepthali Paraiso Maraming mga tao, ang naghahanap ng trabaho Isa na rito ang mga Pilipinong, kung tawagi’y OFW Nilisan ang lugar, na kanilang pinanggalingan Upang tunguhin, masaganang buhay “Teka nga, teka muna", baka akala niyong masaya Hindi niyo nakikita, ang totoong eksena Lalo na kayong mga, naiwang pamilya Na pinapadalhan buwan-buwan, ng malaking pera Gusto ko lang malaman niyo, mga kaganapan dito Bilang isang Pilipino, sa hanay ng OFW Narating ang Dubai, Saudi, at Qatar Ngayon ako’y nasa Scotland dito naghahanapbuhay Pinansin ko ang mga bagay-bagay tungkol sa mga naging buhay Iba’t-ibang karanasan, kanilang nararanasan Hindi lahat nagtagumpay sa larangan ng hanapbuhay May lungkot at saya, may umuwi dahil hindi kaya. Kaming mga Pilipino, tunay na nagtiis magtrabaho Dito sa kabilang mundo, upang pamilya’y umasenso Sakit at hirap, dusa at pawis, aming dinaranas Sa trabaho’y nagpapagal, minsan laging nag-o-overtime May mga tumakas pa, sa lupit ng mga among sadista Hindi alam saan pupunta, saklolo’y kailangan nila Ang iba nama’y nagtiis, upang sa kahihiyan ay tumalilis Nagtago ng ilang buwan, hanggang ang sanggol ay sumilang Ang iba naman sa amin, naghahanap ng kapiling Dahil sa lumbay, naghahanap ng karamay Kahit panandalian lamang, mailabas init ng katawan Kaya tulo’y minsan, sa kulungan sila matatagpuan At marami sa kababayan, nagdaranas ng kawalan Sweldo ay ‘di naibibigay, problema ng kompanya kami’y damay Salamat na lamang, sa kababayan naming nagtagumpay May mga organisasyon, tumutulong, dumadamay At sa ibang nakikipagsapalaran, kahit magkanda utang-utang Makarating lamang sa bansang, akala nila’y matagumpay Tourist visa o visit visa, student visa, at kung ano-ano pa Pagdating sa patutunguhan, pagsisisi’y naranasan Dahil andito na rin lang, kahit anong trabaho’y papasukan Minsan nakikita mo, palakad lakad sa lansangan Magandang suot kailangan, kailanga’y maging balingkinitan Kuntodo ang ngiti sa karamihan, sobrang bango’y puhunan May mga OFW naman, na sampung taon na yata sa hanapbuhay Ngunit walang naipupundar, hindi malaman kung nasaan Hindi marunong mag-ipon, pamilyang naiwa’y bili rito bili roon Lupa’t bahay na pangunahing kailangan, hanggang ngayo’y nangungupahan Kahit saang bansa, ako man ay mapunta Napakaraming OFW, talaga namang naglipana Hindi maiwan-iwan, ang ugaling sobrang yabang Oo nga’t matagal ka na, sana’y pagka propesyonal ay makita Sa maraming nagtagumpay, karamiha’y mga white collar Malaking sweldong natatanggap sa trabaho’y hindi hirap Mga pagpapalang natanggap mga biyaya’y talagang ganap Maraming nabahaginan, pamilya ay nakinabang At sa pagpatuloy mong tagumpay, ikaw na aking kababayan Pagtulong sa kapwa’y maglaan, kabutihan ay ialay Pagpapala sa iba, balik sa iyo ay sobra-sobra At mararanasan mo pa, ang ginhawa sa tuwi-t’wina Kaya naman aking dalangin, sa mga nagnanais ay pakaisipin Mga trabahong papasukan, mag-isip ng kung ilan Isangguni sa Maykapal, kung ito ba ay laan H’wag magmadaling lumisan, dahil ito ay kailangan? Minsan sa pagtakas nagmamadaling umiwas Kaya’t ang problema, laging kasunod niya ‘Wag matulad kay Jonah, na kinain ng balyena Matutong sumunod sa gusto ng Diyos Laging tumawag at laging kumatok May nakalaang magandang plano, ang Diyos sa’yo Magandang hanapbuhay, magandang trabaho Gabay at pagpapala ay makakamtan mo. – GMANews.TV (Tungkol sa may-akda: Si Nepthali Paraiso ay nakapagtrabaho sa Kingdom of Saudi Arabia, at sa Qatar. Ngayon ay isa siyang seafarer na ang barko ay humihimpil sa UK.) Kamusta mga Kapuso! Sana’y hindi kayo magsawa sa pagtangkilik sa ating pitak na ito. Habang may mga kababayan tayo sa abroad - pati ang kanilang mga kabiyak, anak, ina, ama o sinuman na kabahagi ng kanilang buhay - na nais magpaabot ng kanilang saloobin mananatili po ang inyong Kwentong Kapuso. Katulad ng dati, hindi kami magsasawa na basahin ang inyong mga kuwento - maigsi man o mahaba. Kahit na ang laman nito ay naglalabas ng sama ng loob, nagbibigay ng inspirasyon, gustong magpayo, magsumbong, magpatawa o kahit nagpapalipas lang ng oras. Kaya hihintayin namin ang inyong mga email na maaari ninyo itong ipadala sa Pinoyabroad@gmanews.tv Sa mga kababayan namin saan mang dako ng mundo, saludo po kami sa inyo. Mabuhay kayo mga masigasig naming Kapuso sa abroad!