Isyu sa Benham Rise at mga minahan sa Pilipinas, muling tatalakayin sa 'Bawal ang Pasaway'

BAWAL ANG PASAWAY KAY MARENG WINNIE
LUNES, APRIL 24, 2017
10:15 SA GMA NEWS TV

Nag-uumapaw ang likas na yaman ng Pilipinas. Subalit, may mga nagtatangka umano na agawin at sirain ang mga ito.

Isa sa mga isyu kamakailan ay ang pagpasok ng Tsina sa Benham Rise. Sino nga ba ang may karapatan dito - ang Pilipinas o ang Tsina?  Sa one-on-one interview ni  Mareng  Winnie kay  Prof. Jay Batongbacal, ang  kasalukuyang  Director  ng  Institute of Maritime Law  sa Unibersidad ng Pilipinas, ipinaliwanag niya na idineklara ng United Nations  Commission on the Limits of the  Continental  Shelf ang  Benham  Rise bilang bahagi  ng Philippines’ continental shelf.  Sa ilalim  ng  UNCLOS o UN  Convention  on the Law of the Sea,  ang  Benham Rise ay nasa 200 nautical miles mula sa  state baseline or edge ng Pilipinas kaya maituturing na may ekslusibong karapatan tayo rito.

Malaki raw ang magiging pakinabang sa Benham Rise ayon sa mga eksperto dahil sa mga mineral na matatagpuan dito. Bagay na sinang-ayunan ni  Rovella Savella,  Vice President ng UPSTREAM Operations ng Philippine  National Oil  Company. Ayon kay Savella, malaki raw ang potensiyal nito sa gas hydrates o methane.

Sa nakaraang press conference ng Pangulong  Duterte,  sinabi niya na balak niyang baguhin ang pangalan ng Benham Rise sa Philippine Ridge para maipakita  na may karapatan ang Pilipinas dito.  Sinimulan na rin ang pagpapatrolya ng Philippine  Coast Guard sa lugar. Sinabi rin ni Acting  Executive  Director  Maria Lourdes Montero  ng Department of  Foreign Affairs na  tinanggihan na ng  Pilipinas ang  mga  request ng Tsina na magsagawa ng pag-aaral  sa Benham Rise. Ayaw raw kasi ng Tsina na aprubahan ang hiling ng Pilipinas na dapat may  kasamang Pilipinong scientist sa kanilang exploration.

Isa pang mainit na isyu sa kalikasan ay ang pagmimina sa Pilipinas. Balikan natin ang naging one-on-one interview kay DENR Secretary  Gina Lopez. Magpahanggang sa ngayon, kontrobersyal pa rin ang pagpapasara ni Sec. Lopez sa mga minahan.

Noong March 13, 2017, nagsampa sa Office of the Ombudsman ang  Chamber of Mines of the Philippines o  COMP  ng  reklamong paglabag  sa Anti- Graft and Corruption  Practices  Act  at Code of Conduct & Ethical Standards for Public Officials  laban kay   Secretary Lopez. Kinukuwestyon ng  COMP ang  ginawang pag-aaudit ng grupo ni  Lopez.

Kaliwa’t kanan man ang mga batikos kay Sec. Lopez, nagpahayag pa rin si Pangulong  Duterte ng kaniyang suporta sa kalihim. Sa kasalukuyan, nakabinbin pa rin ang  confirmation ng appointment ni  Lopez mula sa Commission on Appointments. Ganunpaman, muli siyang itinalaga ng president sa DENR.

Pagtuunan natin ng pansin ang ating kalikasan ngayong Lunes sa "Bawal ang Pasaway kay Mareng Winnie."