Dion Ignacio, hinubog ng panahon at karanasan sa buhay

  Edad 17 lamang noon ang Kapuso actor na si Dion Ignacio nang subukan niyang pasukin ang mundo ng show business sa unang season ng GMA reality talent search na "StarStruck" (2003) kung saan napasama siya Top 6.   "Yung 'StarStruck' sobrang hindi ko ini-expect. Akala ko after lang nung contest tapos na," ani Dion. "Yun pala magdire-diretso tapos inalagaan ko na lang kung papaano yung sistema dito sa showbiz."   Hingid sa kaalaman ng marami, nadiskubre ang 17-anyos na tubong Siniloan, Laguna sa isang public pool sa Paqui, Laguna. Ang dating Taliba editor na si Leo Bukas, na siyang nakadiskubre sa kanya ang nag-udyok kay Dion na subukan ang pagiging ramp model.   Dahil na rin sa kakulangan sa pera at sa panahong nasa Maynila ang aktor tuwing bakasyon, pinasok ni Dion ang pagiging modelo kung saan pinalad din itong manalo sa modelling contest na "Circle of 10 Image Model Search" noong 2003.   "Parang naisip ko sige magra-ramp modelling ako dito sa Manila. Tapos nanalo ako. Tapos dahil reporter si Tito Leo, marami silang connection sa showbiz, pinasok nila ako sa 'StarStruck.' Tapos dire-diretso na, hindi ko akalain ganito mangyayari, sobrang blessing," pag-alala ni Dion.   Patuloy pa niya, "Siguro talagang bigay sa'kin ni God 'to kasi talaga wala naman talaga ako noon. Tapos ngayon napag-aaral ko na yung mga kapatid ko."    Inaasahan ng pamilya   Tumatayo ring bread winner si Dion sa kaniyang pamilya.    Ngayong maayos na ang takbo ng kanyang trabaho, masaya ang aktor dahil nakakangiti na ang kanyang ina. Dating nagtitinda ng ulam ang ina ni Dion noo para matustusan ang kanilang pangangailan.   Sa tulong ng pagsisikap ni Dion, napagtapos na niya ang bunsong kapatid sa kursong nursing,  habang ang isa pa ay pansamantalang tumigil para magtrabaho sa Saudi Arabia.   Mula sa 'bottom 5' to leading man role   Hindi naging mabilis at madali ang pag-usad ng career ni Dion bilang aktor.   Sa sampung taon ni Dion sa show business, marami itong kinuhang supporting roles bago pinagkatiwalaan na maging leading man sa serye.   "Hindi madali. Minsan may show ako tapos naranasan ko na isang taon mabakante, pero hindi naman ako pinapabayaan ng GMA. May binibigay sila sa'king out of town na show so doon ako kumikita ng pera," kwento niya.   At bagama't matumal ang trabahong dumadating kay Dion noong nagsisimula siya, hindi nawalan ng pag-asa ang aktor at ipinagdarasal na lamang nitong mabigyan siya ng mga proyekto sa telebisyon at out of town shows.   Kwento pa ni Dion, "Kasi parang ngayon dito talaga ako sumasandal sa showbiz, e. Natatakot din ako nong time na yun bakit wala akong shows, saan ako kukuha ng pera— hindi man ako nakapag-college, ako pa rin nagpapa-aral sa mga kapatid ko."   "So ang ginawa ko, nagpa-pray lang ako— si God lang talaga tapos ang nangyari nagkaka-show naman ako. Tapos binibigyan ako ng Artist Center ng out of town shows, raket, doon ako kumikita," patuloy niya.   Sa ngayon, lubos na nagpapasalamat si Dion dahil tila sinagot ang mga dasal niya— at kasabay ng kanyang mahigit walong taon na paghihintay ay may mga natuklasan siyang bagong technique upang mas pahusayin pa ang kanyang talento sa pag-arte.   "Ngayon sobrang swerte ko dahil ngayon, parang yung nangyaring eight years, [naging] training ko para sa show ko ngayon."   Dalawa sa pinagbidahang palabas ni Dion sa GMA Afternoon Prime ang "Magdalena" (2012) kasama si Bela Padilla at "Maghihintay Pa Rin" kasama si Bianca King.   "Kasi dati 'pag uma-acting ako, ninenerbiyos pa ako. Hindi ko pa alam mga techniques kung paano alagaan yung character.  Ngayon kasi nagmature na ako, parang alam ko na kung paano ko dapat alagaan, alam na lagyan sila ng background."   Ilan pa sa mga serye na napabilang si Dion ay sa "The Good Daughter" (2012), "Amaya" (2011), "Saan Darating Ang Umaga" (2008), "Babangon Ako't Dudurugin Kita" (2008), at "Sugo" (2006).    "Acting, emotion"   Malaki raw ang pinagbago ni Dion pagdating sa pag-arte. Dati ay "hilaw" pa umano ang pag-arte niya dahil mas pinapahalagahan niya na makabisa ang kanyang mga linya, na nagiging dahilan kung bakit minsa'y nawawala ang emosyon niya kapag nagbitaw ng mga linya. Ngayon, sinisiguro raw nito na mas personal na ang emosyon na ipinakikita ni Dion.   Malaking tulong din daw kay Dion ang mga wokshop na sinalihan tulad ng sense-memory workshop ng primyadong aktres at direktor na si Direk Gina Alajar. Gayundin, nagsimula ring magbago ang pananaw ng aktor sa pag-arte nang sumabak siya sa "Magdalena."   Pag-alala pa nito sa workshop na sinalihan, "Ang acting daw, yung kukuha ka sa personal mo, ang sense-memory mo; naramdaman mo na dati pero may kamukha kang eksena. Parang nararamdaman mo na yung eksena dati tapos ibabalik mo 'yon."   Kung dati ay ina-acting niya ang kanyang acting, iba na daw ngayon.   "Hanggat maaari ginagawa ko ang totoo, hindi ko kailangang umakting. Hanggat maaari totoo 'tong nangyayari— ibang tao ito, hindi ako ito, ganun na ako mag-isip ngayon. Dati hindi ganun, umaarte ako, Dion pa rin eh. Kaya nalilito ako kung Dion ba o yung karakter," paliwanag ni Dion.   Leading actor   Lubos ang pasasalamat ni Dion sa oportunidad na ipinagkaloob ng GMA-7 sa kanya ngayong nasa leading man status na siya.   "Simple lang din naman kasi ako. Pero ako blessed ako dahil nagle-lead na ako ngayon. Sobrang napapansin na yung paghihirap ko, yung effort na binibigay ko sa show, napapansin nila," aniya.    "So, thankful ako sa sa GMA, sa Artist Center dahil nagtitiwala sila sa kakayahan ko. Kaya ngayon pagbubutihan ko para may mga next pa," dagdag niya.    Gayunpaman, upang hindi masayang ang pagkakataong ipinagkaloob sa kanya, tinatrato daw ni Dion ang kanyang bawat trabaho bilang audition sa susunod na papel.   Paliwanag niya, "Hindi ko sasayangin yung tiwala at saka ini-imagine ko, itong sa show ko na 'to. Para sa sarili ko, audition ko ngayon yung performance ko para kapag napansin nila, ng mga boss na maganda pinapakita ko, magkaroon ako ng work ulit na mapakita ko na seryoso ako at sinisipagan ko sa trabaho."   Shoe collection   Ipinaalam naman ng aktor na mahilig siya sa mga sapatos at basketball.   Ang pamimili umano ng rubber shoes ang stress reliever ng aktor tuwing pagod ito sa trabaho.   Kwento ni Dion, "Yon ang way ko kapag stressed ako, parang gusto kong mamili [ng shoes]. Sobrang ganda ng pakiramadam, mawawala yung bigat ng pakiramdam mo— parang kung pagod ka, bibili ka nakakatanggal ng stress."   Ang anim na paboritong sapatos ni Dion ang kanyang Nike Jordan 1, Nike  Jordan 8, Nike  Jordan 5, Nike Lebron James, Nike Kevin Durant, at Li-ning Dwayne Wade.    "Mababaw lang ako, 'yon lang ang kaligayan ko," pagtatapos ni Dion. - Mac Macapendeg/FRJ, GMA News