Bayan Ko, KMJS, at ilang programa ng GMA at GMA News TV, wagi sa 2013 Catholic Mass Media Awards

Nakatanggap ng 11 parangal ang ilang programa ng GMA Network at GMA News TV kabilang ang "Bayan Ko," "State of the Nation with Jessica Soho," "Investigative Documentaries," at "Pepito Manaloto" sa katatapos na 2013 Catholic Mass Media Awards (CMMA) na idinaos nitong Biyernes. 

 

Kinilala ang primetime news program na "State of the Nation with Jessica Soho" bilang Best Newscast habang natanggap naman ng "Kapuso Mo, Jessica Soho" ang parangal bilang Best Magazine Show. Pinarangalan din ang "Bayan Ko," ang kauna-unahang drama serye ng GMA News TV na pinagbidahan ni Rocco Nacino bilang Best Drama Series. Gayundin ang "Pepito Manaloto" bilang Best Comedy Program.

 

Bukod pa rito, nagwagi ang mga programa ng GMA News TV na "Poptalk" ni Tonipet Gaba bilang Best Children and Youth Program, showbiz reality show "Follow That Star" bilang Best Adult Educational Program, at "Investigative Documentaries" ni Malou Mangahas bilang Best Public Service Program.

 

Samantala, pareho namang natanggap ng kantang "Dapat Tama," ang election advocacy anthem ng GMA na kinanta nina Gloc-9 at Denise Barbacena, ang parangal bilang Best Secular Song at Best Music Video. 

 

Kinilala rin ang "Biyahe ni Drew" bilang Best Adult Educational category at news coverage ng GMA na "Habemus Papam" bilang Best Special Event Coverage. —Mac Macapendeg/KG, GMA News