'Bonifacio,' itinanghal na Best Picture; Jennylyn at Derek, wagi rin sa 2014 MMFF Awards Night

Itinanghal na Best Picture ang "Bonifacio, Unang Pangulo" sa katatapos na awards night ng 2014 Metro Manila Film Festival (MMFF) nitong Sabado ng gabi. Big winner din sina Jennylyn Mercado at Derek Ramsay sa pelikulang "English, Only Please."
 
Maliban sa Best Picture, nakamit din ng "Bonifacio" ang Gatpuno Antonio Villegas Cultural Award, at Fernando Poe Jr. Memorial Award for Film.
 
Itinanghal namang 2rd Best Picture ang romantic-comedy movie na "English Only Please" na pinagbibidahan nina Jennylyn Mercado, na itinanghal na Best Actress, at si Derek Ramsay, na hinirang na Best Actor.

Samantala, kinilala namang Best Child Performer si Ryzza Mae Dizon para sa "My Big Bossing Adventures."
 
Naiuwi naman ng "Kubot: The Aswang Chronicles 2" ang 3rd Best Picture award.
 
Kabilang sa mga nakamit pang parangal ng "Kubot..." ay ang Best Supporting Actress para kay Lotlot de Leon at Best Supporting Actor para kay Joey Marquez.
 
Gayundin ang Best Make Up, Best Production Design, at Best Visual Effect.
 
Natanggap naman ng pelikulang "English Only Please" ang Best Screenplay, Best Original Story,  Best Editor, at Best Director Award para kay Dan Villegas.
 
Ilan pa sa hinakot na parangal ng Bonifacio ay ang Best Cinematographer, Best Sound Engineer, Best Musical Score, Festival Best Theme Song, Best Parade Float at Youth Choice awards. -- FRJ, GMA News