Ilang Kapuso star, wagi sa 2nd PEP List Awards

Dinaluhan ng maraming Kapuso stars ang pangalawang taon ng Philippine Entertainment Portal o PEP List Awards Night nitong Huwebes ng gabi.

Sa red carpet, nagpabonggahan sa kasuotan ang mga dumalong celebrity. (GALLERY: Kapuso stars win and sparkle in 2nd PEP awards)



Sa ulat ng GMA News TV's Balitanghali, sinabing kabilang sa mga sabay na dumating, ang "The Rich Man's Daughter" stars na sina Rhian Ramos at Luis Alandy, na kapwa award presenters.

Nandoon din ang "Let The Love Begin" stars na sina Gabbi Garcia at Ruru Madrid.

Present din si GMA Network chairman and CEO Attorney Felipe L. Gozon, kasama ang kaniyang maybahay na si Mrs Teresa Gozon.

Dumalo rin ang anak nila at president ng GMA Films na si Attorney Annette Gozon-Abrogar.

Nasungkit ni Jennylyn Mercado ang "Teleserye Actress of the Year" award para sa natatangi niyang pagganap sa GMA telebabad drama series na "Rhodora X".

"Natutuwa ako kasi lahat ng mga pinaghirapan namin," ani Jen. "Siyempre hindi biro ang pagiging artista, kasama na dun yung passion, kasama yung puso 'pag ginagawa mo yung isang proyekto. So nagpapasalamat ako kasi napansin naman nila yung hirap namin."

Si Gabby Eigenmann naman ang itinanghal bilang "Teleserye Actor of the Year" para sa ipinamalas niyang husay bilang gay-daddy sa Kapuso afternoon soap na "Dading".

"Overwhelmed. Hindi pa nga nagsi-sink in siguro pagpasok ko," masaya niyang pahayag.

Sina Jennylyn at Gabby ang first recipients ng nasabing mga award.

Winner din ang "Dading" bilang "Daytime Show of the Year." Habang "Newsmaker of the Year" naman ang Kapuso Primetime Queen and King, and soon-to-be-parents na sina Marian Rivera at Dingdong Dantes. -- FRJ, GMA News