Nora Aunor, Alessandra de Rossi, wagi sa 36th Gawad Urian

Inuwi ng aktres na si Alessandra de Rossi ang parangal bilang Best Supporting Actress para sa kanyang papel sa pelikulang "Sta. Niña" sa katatapos na 36th Gawad Urian ng Manunuri ng Pelikulang Pilipino (MPP) na idinaos noong Martes sa Taguig City.

 

Kasabay nito ay itinanghal naman ang nag-iisang Superstar na si Nora Aunor bilang Best Actress sa kanyang pagganap sa pelikulang "Thy Womb" na idinirekta ni Brillante Mendoza.

 

Sa naturang kategoriya sa Gawad Urian, nominado si Alessandra para sa pelikulang "Mater Dolorosa" at "Sta. Niña."

 

Nakalaban niya rito sina Mylene Dizon (Aparisyon), Raquel Villavicencio (Aparisyon), Joy Viado (MNL 143), Clara Ramona (In Nomine Matris), at Annicka Dolonius (Ang Nawawala).

Bukod sa naturang parangal, nanalo rin kamakailan si Alessandra sa Asean International Film Festival and Awards bilang Best Actress para sa "Sta. Niña."

 

Wika naman ni Ate Guy sa kanyang acceptance speech ayon sa ulat ni William R. Reyes ng PEP.ph, “Napakasarap po ng pakiramdam na ang ginagawa ninyong proyekto ay kinikilala sa ibang bansa.”

 

“Pero mas masarap po pala talaga ang pakiramdam kung ang inyong mga kababayan mismo dito sa atin ang nagbibigay ng parangal," patuloy nito.

 

Nakalaban ni Ate Guy sa nasabing kategoriya sa Gawad Urian sina Alessandra de Rossi (Baybayin), Assunta de Rossi (Baybayin), Gina Alajar (Mater Dolorosa), Ama Quiambao (Diablo), Jodi Sta. Maria (Aparisyon), Shamaine Centenera-Buencamino (Requieme), Olga Natividad (Mga Dayo), at Liza Dino (In Nomine Matris).

Hindi ito ang unang beses na nakatanggap ng parangal ang "Thy Womb."

Nagwagi rin ang “Thy Womb” sa Venice Filmfest/Independent Critics Group (Italy), Asia-Pacific Screen Awards (APSA), sa Brisbane, Australia, at Asian Film Awards, sa Hongkong.

Gayundin, nanalo rin ng parangal sina Ate Guy at ang direktor na si Brillante Mendoza sa Venice at Australia para sa nasabing pelikula.

 

List of winners

 

Narito ang listahan ng mga nagwagi sa 36th Gawad Urian Awards.

 

Best Film: Ang Paglalakbay ng mga Bituin sa Dilim ng Gabi (Producers: Cinema One Originals, Skyweaver Productions, Red Motion Media, HYDEntertainment, Alchemy of Vision and Light Film and TV Productions and Conrad Cejoco)

 

Best Director: Adolfo Alix (Mater Dolorosa)

 

Best Screenplay: Mes De Guzman (Diablo)

 

Best Actor: Jericho Rosales (Alagwa)

 

Best Actress: Nora Aunor (Thy Womb)

 

Best Supporting Actor: Art Acuña (Posas)

 

Best Supporting Actress: Alessandra de Rossi (Sta. Niña)

 

Production Design: Dante Mendoza (Thy Womb)

 

Cinematography: Whammy Alcazaren (Colossal)

 

Editing: Aleks Castañeda (Kalayaan)

 

Music: Diwa de Leon (Baybayin)

 

Best Sound: Willy Fernandez, Bong Sungcang, Ferdinand Marcos Sabarongis (Florentina Hubaldo, CTE)

 

Best Documentary: Harana (Benito Bautista)

 

Best Short Film: Ritmo (Remton Siega Zuasola)

 

Natatanging Gawad Urian: Mila del Sol

 

Ang MPP ay isang grupo ng local film critics na kasalukuyang pinamumunuan ni Prof. Tito Genova Valiente.

 

—Mac Macapendeg/KG, GMA News