Willie Revillame wants Jeyrick 'Carrot Man' Sigmaton to guest in 'WowoWin'

Bumisita ngayong linggo ang tinaguriang "Carrot Man" ng Cordillera na si Jeyrick Sigmaton, na sumisikat ngayon sa social media dahil sa kaniyang kasipagan at pagkakahawig sa ilang artista.

Sa mga naunang pahayag, sinabi ni Jeyrick na masaya siya sa kasikatang tinatamasa dahil nabibigyang-pansin muli ang Mountain Province at ang mga tulad niyang Igorot.

Bukod sa pangarap na makapagtapos ng pag-aaral at makatulong sa kaniyang pamilya at mga kapatid, ibinahagi rin ng binata ang pagnanais niyang makita ang kaniyang idolo na si "Wowowin" host Willie Revillame.

Nitong Lunes, bago umuwi si Jeyrick sa Mountain Province mula sa sandaling pagbisita sa Maynila, nagkaroon siya ng pagkakataong makaharap ang batikang host.

Nagkita ang dalawa matapos ang kauna-unahang live TV guesting ng tinaguriang "Carrot Man" sa "Unang Hirit" nitong Lunes.

 

"Carrot Man" Jeyrick Sigmaton meets his idol, Willie Revillame! #CarrotMan #Kapuso

A photo posted by gmanetwork (@gmanetwork) on

Feb 29, 2016 at 4:00am PST

“Opo, idol ko po siya. ‘Yung 'Wowowin' ay napapanuod po namin sa amin. Siya ang nagustuhan kong idol ko kasi po masaya ‘yung show niya at nagbibigay aral sa mga kabataan,” ayon kay Jeyrick sa ulat ng "24 Oras."

Payo naman sa kaniya ni Willie sa binata, "Sabi ko sa kanya, ang malaking utang na loob mo ay doon sa kumuha sa ‘yo kasi lahat ng ‘to ay nangyayari (dahil doon). Kung hindi ka kinunan ng camera na ‘yun [at lumabas] sa Facebook, wala ka dito sa GMA, (hindi ka) nakita ni Ms. Jessica Soho."

Matapos ang ginawang feature ng "Kapuso Mo Jessica Soho" tungkol kay Jeyrick at sa guesting ng binata sa "Unang Hirit," plano naman ni Willie na i-guest ito sa kaniyang game show, na ipinapalabas araw-araw sa GMA Network. —Bianca Rose Dabu/KBK, GMA News